टीम इंडियाच्या अडचणी वाढल्या, हार्दिक पांड्या बांगलादेश दौऱ्यात दुखापतीमुळे संघाबाहेर

“हार्दिक आपल्या पाठीच्या दुखापतीवर डॉक्टरांचा सल्ला घेण्यासाठी इंग्लंडला रवाना होईल. तो बांगलादेश दौऱ्यात नक्कीच खेळणार नाहीये, मात्र तो आणखी किती दिवस क्रिकेट खेळू शकणार नाही हे अजून निश्चीत समजलेलं नाही. डॉक्टरांशी सल्लामसलत केल्यानंतर त्याच्याबद्दल निर्णय घेण्यात येईल.” पीटीआय वृत्तसंस्थेशी बोलत असताना बीसीसीआयमधील सुत्रांनी माहिती दिली. विश्वचषकानंतर हार्दिक पांड्याला विंडीज दौऱ्यात विश्रांती देण्यात आली होती. यानंतर त्याने आफ्रिकेविरुद्ध टी-२० मालिकेत पुनरागमन केलं होतं. आगामी टी-२० विश्वचषकाच्या दृष्टीकोनातून हार्दिक हा महत्वाचा खेळाडू आहे, त्यामुळे आगामी काळात त्याच्या दुखापतीबद्दल नेमकी काय माहिती समोर येतेय हे पाहणं महत्वाचं ठरणार आहे.