उपांत्यपूर्व फेरीच्या पहिल्या लीगमध्ये अ‍ॅटलेटिको माद्रिदवर २-१ अशी मात; उपांत्य फेरीची दावेदारी भक्कम
घरच्या मैदानावर कट्टर प्रतिस्पर्धी रिअल माद्रिदकडून झालेल्या मानहानीकारक पराभवाचे दु:ख विसरून बार्सिलोना क्लबने बुधवारी युरोपियन महासंघाच्या (युएफा) चॅम्पियन्स लीग फुटबॉल स्पध्रेत दमदार विजयाची नोंद केली. लुईस सुआरेझच्या दोन गोलच्या जोरावर बार्सिलोनाने उपांत्यपूर्व फेरीच्या पहिल्या लीगमध्ये अ‍ॅटलेटिको माद्रिदवर २-१ असा विजय मिळवला. अ‍ॅटलेटिकोकडून फर्नाडो टोरेसने एकमेव गोल नोंदवला.
प्रेक्षकांनी खचाखच भरलेल्या कॅम्प नाऊ स्टेडियमवर गेल्या आठवडय़ात ला लिगा फुटबॉल स्पध्रेतील सामन्यात बार्सिलोनाला रिअल माद्रिदकडून पराभव पत्करावा लागला होता. या पराभवामुळे बार्सिलोनाची यंदाच्या हंगामातील ३९ सामने अपराजित राहण्याची मालिका खंडित झाली होती. त्यामुळे चॅम्पियन्स लीगच्या या लढतीत बार्सिलोनाच्या कामगिरीवर साऱ्यांचे लक्ष लागले होते. २५व्या मिनिटाला टोरेसने अप्रतिम गोल करून बार्सिलोनाला धक्का दिला. मात्र, अवघ्या दहा मिनिटांत पंचांनी लाल कार्ड दाखवल्यामुळे टोरेसला मैदान सोडावे लागले. दहा खेळाडूंसह खेळणाऱ्या माद्रिदने मध्यंतरापर्यंत १-० अशी आघाडी घेत बार्सिलोनावरील दडपण वाढवले होते.
माद्रिदच्या या रणनीतीमुळे स्टेडियमवर तणावाचे वातावरण दिसू लागले, परंतु दुसऱ्या सत्रात सुआरेझच्या गोलने हा तणाव मावळला. ६३व्या मिनिटाला जॉर्डी रॅमोसच्या पासवर सुआरेझने गोल करत बार्सिलोनाला १-१ अशी बरोबरी मिळवून दिली. या गोलने स्टेडियमवर पुन्हा जल्लोश सुरू झाला आणि त्यात ७४ व्या मिनिटाला सुआरेझने भर घातली. सुआरेझच्या या दुसऱ्या गोलने सामना बार्सिलोनाच्या बाजूने झुकला आणि उपांत्यपूर्व फेरीच्या पहिल्या लीगमध्ये त्यांनी २-१ अशी आघाडी घेतली आहे. या आघाडीमुळे त्यांचे उपांत्य फेरीतील स्थान जवळपास निश्चित झाले आहे.
बायर्न म्युनिकची विजयी घोडदौड
अ‍ॅर्टुरो व्हिडालच्या अप्रतिम हेडरच्या जोरावर बायर्न म्युनिचने चॅम्पियन्स लीग फुटबॉल स्पध्रेच्या उपांत्यपूर्व फेरीच्या पहिल्या लीग सामन्यात बेनफिकावर १-० असा निर्णायक विजय मिळवला. या विजयाबरोबर म्युनिकने उपांत्य फेरीच्या दिशेने कूच केली आहे. सामन्याच्या दुसऱ्याच मिनिटाला व्हिडालने गोल करून म्युनिकला १-० अशी आघाडी मिळवून दिली होती.
पहिल्या सत्रात टोरेस मैदानाबाहेर गेल्यामुळे सामन्यावर निश्चितच परिणाम झाला. तो एक महान खेळाडू असल्याने त्याची तीव्रता अधिक जाणवली. त्याच्या क्षमतेबद्दल सर्वाना कल्पना आहे.
– लुईस सुआरेझ
०७ : चॅम्पियन्स लीगच्या मागील आठ हंगामांत बार्सिलोनाने सात वेळा उपांत्य फेरीत स्थान पटकावले आहे. २०१३-१४ साली अ‍ॅटलेटिको माद्रिदने उपांत्यपूर्व फेरीत त्यांचे आव्हान संपुष्टात आणले होते.
०७ : बार्सिलोनाने अ‍ॅटलेटिको माद्रिदविरुद्ध सलग सात सामन्यांत विजय मिळवून विक्रम प्रस्थापित केला आहे.
०२ : बार्सिलोना आणि रिअल माद्रिद या दोन क्लब्सनी चॅम्पियन्स लीगच्या यंदाच्या हंगामात अपराजित राहण्याची मालिका कायम राखली आहे. गेल्या हंगामातील दोन पराभव आणि दोन अनिर्णित निकालानंतर बार्सिलोनाने २१ सामन्यांत १७ विजय मिळवले आहेत.
२५ : बार्सिलोनाचा अव्वल आघाडीपटू लिओनेल मेस्सीने कारकिर्दीत एकूण ४९९ गोल्स नोंदवले असून त्यापैकी २५ गोल अ‍ॅटलेटिको माद्रिदविरुद्ध आहेत. माद्रिदविरुद्ध सर्वाधिक गोल करण्याचा विक्रम मेस्सीच्याच नावावर आहे.
४३ : लुईस सुआरेझ, लिओनेल मेस्सी आणि नेयमार या त्रिकुटाने चॅम्पियन्स लीग स्पध्रेतील यंदाच्या हंगामात ५१ लढतीत ४३ गोल केले आहेत. गतवर्षीच्या तुलनेत ही कामगिरी ८४ टक्क्याने अधिक आहे.
