जागतिक बुद्धिबळ स्पर्धा : बरोबरीची कोंडी फुटेना!

लंडन : तीन वेळा जगज्जेता ठरलेला मॅग्नस कार्लसन आणि अमेरिकेचा आव्हानवीर फॅबियानो कारुआना यांच्यात सुरू असलेल्या जागतिक अिजक्यपद बुद्धिबळ स्पर्धेतील पाचवा डावही बरोबरीत सुटला. गेल्या चार डावांपेक्षा गुरुवारी रात्री अतिशय रंगतदार डावाची अनुभूती चाहत्यांना मिळाली. पण जवळपास सव्वातीन तास रंगलेला हा डाव ३४ चालींनंतर बरोबरीत राहिला.

आता पाच फेऱ्यांनंतर दोघांचेही प्रत्येकी २.५ गुण झाले आहेत. नॉर्वेच्या कार्लसनला पुढील दोन डावांत पांढऱ्या मोहऱ्यांसह खेळण्याची संधी मिळणार असल्यामुळे याचा फायदा उठवण्याचा त्याचा प्रयत्न असेल. पांढऱ्या मोहऱ्यांनिशी खेळण्याची संधी कारुआनाला मिळाली असली तरी या आठवडय़ात तिसऱ्यांदा सिसिलियन व्हेरिएशनने डावाला सुरुवात झाली. सुरुवातीला काहीसा चाचपडणाऱ्या कारुआनाने सहाव्या चालीनंतर आक्रमक पवित्रा अवलंबला. आपल्या प्याद्याचा बळी देत त्याने कार्लसनवर दडपण आणण्याचा प्रयत्न केला.

पटावर चांगली स्थिती निर्माण करणाऱ्या कारुआनाला १३व्या चालीपर्यंत मोहरे सरकवण्यास फक्त १३ सेकंदांचा अवधी लागत होता. पण १९व्या चालीनंतर त्याचा वेग मंदावला. कारुआनाच्या प्रत्येक चालीला उत्तर असल्याचे दाखवून देत कार्लसनने हा सामना बरोबरीत सोडवला. ‘‘पाचवा डाव खरोखरच रंगतदार होता. काळ्या मोहऱ्यांनिशी खेळताना अशीच परिस्थिती राहिल्यास चांगले होईल. कार्लसनने चांगला अभ्यास केल्यामुळे त्याने या डावात चांगला खेळ केला,’’ असे कारुआनाने सांगितले.