महाराजा ट्रॉफी स्पर्धेत सुपर ओव्हरची हॅट्ट्रिक; टाय सामन्याचा निकाल लावताना अनोखा विक्रम, पाहा VIDEO

क्रिकेटच्या इतिहासात प्रथमच एकाच सामन्यात तीन सुपर ओव्हर्स –

क्रिकेटच्या इतिहासात प्रथमच एकाच सामन्यात तीन सुपर ओव्हर्स पाहायला मिळाल्या. हा सामना सध्या सोशल मीडियावर त्याच्या ३ रोमांचक सुपर ओव्हर्समुळे चर्चेत आहे. वास्तविक, २३ ऑगस्ट रोजी बंगळुरूच्या एम चिन्नास्वामी स्टेडियमवर महाराजा टी-२० ट्रॉफीमध्ये मयंक अग्रवालच्या नेतृत्वाखालील बंगळुरूच्या ब्लास्टर्स आणि मनीष पांडेच्या नेतृत्वाखालील हुबळी टायगर्स यांच्यात सामना झाला. या सामन्यात प्रथम फलंदाजी करताना हुबळी टायगर्स संघाने २० षटकांत सर्वबाद १६४ धावा केल्या होत्या. यानंतर लक्ष्याचा पाठलाग करण्यासाठी आलेल्या बंगळुरू ब्लास्टर्सचा संघही २० षटकांत १६४ धांवावर गडगडला. ज्यामुळे सामना टाय झाला. यानंतर सामन्याचा निकाल लावण्यासाठी पहिली सुपर ओव्हर खेळवण्यात आली.

सुपर ओव्हर्सची हॅट्ट्रिक –

या सामन्यातील पहिल्या सुपर ओव्हरमध्ये बंगळुरू ब्लास्टर्सने प्रथम फलंदाजी करत १ गडी गमावून १० धावा केल्या होत्या. आता हा सामना जिंकण्यासाठी हुबलीला ११ धावा करायच्या होत्या, पण पुन्हा एकदा स्कोअर बरोबरीत राहिला. हुबलीचा संघही केवळ १० धावा करू शकला. ज्यामुळे आता सामना दुसऱ्या सुपर ओव्हरमध्ये गेला जिथे पुन्हा एकदा दोन्ही संघांचा स्कोअर बरोबरीत राहिला. या दुसऱ्या ओव्हरमध्ये हुबळी टायगर्सने ८ धावा केल्या आणि बंगळुरू ब्लास्टर्स संघाला १ गडी गमावून केवळ ८ धावा करता आल्या.

हेही वाचा – Shikhar Dhawan : टीम इंडियाच्या ‘गब्बर’चा क्रिकेटला अलविदा, भावनिक VIDEO शेअर करत जाहीर केली निवृत्ती

सलग दोन सुपर ओव्हरमध्ये स्कोअर बरोबरीत राहिल्यानंतर, तिसरी सुपर ओव्हर खेळली गेली. ज्यामध्ये बंगळुरू ब्लास्टर्सने प्रथम फलंदाजी करताना १ गडी बाद १२ धावा केल्या, मात्र, यावेळी प्रत्युत्तरात हुबळी टायगर्सने १३ धावा करत सामना जिंकला. अशाप्रकारे या रोमांचक सामन्याचा निकाल ३ सुपर ओव्हरमध्ये लागला.