पुणे, कोल्हापूर, सोलापूरने पहिला दिवस गाजवला

अहमदनगर येथे सुरू असलेल्या ५८ व्या महाराष्ट्र राज्य अजिंक्यपद व महाराष्ट्र केसरी किताब कुस्ती स्पर्धेत मॅट विभागात विशाल माने (६५ किलो, कोल्हापूर) व प्रकाश कोळेकर (५७ किलो, सांगली) तर माती विभागात सागर मारकड (६५ किलो, पुणे शहर) व आबासाहेब मदने (५७ किलो, सोलापूर) या मल्लांनी पहिल्याच दिवशी सुवर्णपदकावर मोहोर उमटवली.
६५ किलोच्या अंतिम फेरीत आंतरराष्ट्रीय खेळाडू विशाल मानेने लौकिकाला साजेशा खेळ करत मुंबईच्या संजय पाटीलला ९-२ अशा फरकाने पराभूत केले. नगरच्या किरण नलावडेचा माने याने उपांत्य फेरीतच पराभव केला. ५७ किलोमध्ये सांगलीच्या कोळेकरने पुणे शहरच्या शितोळेचा ४-२ असा पराभव केला.