Matt Henry Out of World Cup 2023: एकदिवसीय विश्वचषक २०२३ मधील न्यूझीलंड संघाच्या अडचणी कमी होण्याची चिन्हे दिसत नाहीत. सलग तीन सामने गमावल्यानंतर संघाचा स्टार वेगवान गोलंदाज मॅट हेन्री वर्ल्डकपमधून बाहेर पडणे हा ब्लॅक कॅप्ससाठी मोठा धक्का आहे. वेगवान गोलंदाज मॅट हेन्रीच्या हाताला झालेली दुखापत गंभीर असल्याचे समोर आले आहे. अशा स्थितीत त्याला विश्वचषक संघातून वगळण्यात आले आहे. पण आता संघाने मॅट हेन्रीच्या जागी आणखी एका स्टार वेगवान गोलंदाज काइल जेमिसनचा संघात समावेश करण्याचा निर्णय घेतला आहे.
बुधवारी रात्री दक्षिण आफ्रिकेविरुद्ध गोलंदाजी करताना मॅट हेन्रीला दुखापत झाली होती. परिस्थिती अशी होती की त्याला आपले षटक मध्येच सोडावे लागले. सामन्यानंतर त्याचे एमआरआय स्कॅन करण्यात आले, ज्यामध्ये त्याची दुखापत गंभीर असून ती बरी होण्यास दोन ते चार आठवडे लागतील असे स्पष्ट झाले. यानंतर न्यूझीलंड संघाने हेन्रीला वगळले आणि त्याच्या जागी जेमिसनचा समावेश करण्याचा निर्णय घेतला.
न्यूझीलंड संघ व्यवस्थापनाला मॅट हेन्रीच्या एमआरआय स्कॅनच्या निकालांबद्दल आधीच माहिती होती की त्याची दुखापत लवकर बरी होणार नाही. अशा स्थितीत आफ्रिकेसोबतच्या सामन्यानंतर लगेचच त्यानी वेगवान गोलंदाज काईल जेमिसनला भारतात येण्याचे आमंत्रण पाठवले होते. जेमिसनही गुरुवारी रात्री संघात सामील झाला आहे. तो बेंगळुरूमध्ये संघासोबत सराव सत्रात भाग घेत आहे. त्याला आधी मॅट हेन्रीसाठी कव्हर म्हणून बोलावण्यात आले होते, पण आता त्याला किवी संघाच्या विश्वचषक संघाचा भाग बनवण्यात आले आहे.
विश्वचषकात सहभागी होण्यासाठी खरोखरच उत्साहित –
न्यूझीलंड संघाचे मुख्य प्रशिक्षक गॅरी स्टीड म्हणाले, “आम्ही भाग्यवान आहोत की काइलसारख्या क्षमतेचा खेळाडू आमची वाट पाहत आहे. त्याचे कौशल्य आणि शारीरिक गुणधर्म त्याला एक उत्कृष्ट गोलंदाज बनवतात आणि स्पर्धेच्या पहिल्या दोन आठवड्यात तो आमच्यासोबत सराव करू शकला हा एक अतिरिक्त बोनस आहे. काईलला पाठीच्या दोन वेगवेगळ्या दुखापतींमधून बरे होण्यासाठी खूप मेहनत करावी लागली आहे आणि मला माहित आहे की तो त्याच्या पहिल्या एकदिवसीय विश्वचषकात सहभागी होण्यासाठी खरोखरच उत्साहित आहे.”
हेही वाचा – IND vs SL, World Cup 2023: श्रेयस अय्यर झेलबाद होताच अथिया शेट्टी झाली नाराज, VIDEO होतोय व्हायरल
काइल जेमिसनला देखील भारतीय खेळपट्ट्यांवर गोलंदाजी करण्याचा खूप अनुभव आहे. आयपीएलच्या मागील हंगामात जेमिसन चेन्नई सुपर किंग्जकडून गोलंदाजी करताना दिसला होता. काईलने आतापर्यंत आयपीएलमध्ये ९ सामने खेळले असून त्यात ९ विकेट घेतल्या आहेत. याशिवाय, त्याने न्यूझीलंड संघासाठी १३ एकदिवसीय सामने खेळले आहेत, ज्यात १४ विकेट घेतल्या आहेत.
