एमसीएची निवडणूक गणेशोत्सवानंतरच होणार

‘‘ शेट्टी यांच्या याचिकेवर २४ जुलैला सुनावणी होणार असून त्याचीच एमसीए वाट पाहत आहे. त्यानंतरच आम्ही निवडणूकीच्या तारखेसाठी बैठक घेऊ,’’ असे सूत्रांनी सांगितले.
१५ जुलैला कार्यकारीणीची दोन वर्षे पूर्ण झाल्याने एमसीएची निवडणूक कधी होणार, यावर चर्चा सुरू आहे. २४ जुलैला येणारा निकाल पाहून पुढील आठवडय़ात निवडणूकीची तारीख ठरवण्यासाठी बैठक बोलावण्यात येण्याची शक्यता आहे. तारीख ठरवल्यावर ४५ दिवसांच्या अवधीनंतर निवडणूक घेण्याचा नियम असल्याने गणेशोत्सवानंतर निवडणूक होणार असल्याचे स्पष्ट होत आहे.
विश्वसनीय सूत्रांनी सांगितले की, एमसीएची निवडणूक २० सप्टेंबरला होण्याची दाट शक्यता आहे, पण जर २० सप्टेंबरला निवडणूक झाली नाही, तर बीसीसीआयच्या निवडणूकीनंतरच एमसीएची निवडणूक होईल.
त्याचबरोबर या बैठकीमध्ये इंडियन प्रीमिअर लीग (आयपीएल), भारतीय क्रिकेट नियामक मंडळ (बीसीसीआय) आणि एमसीएमधून मानधन मिळणाऱ्या कोणत्याही व्यक्तीला निवडणूक लढवता येणार नाही, याविषयावरही चर्चा करण्यात आली.