महापौर चषक खो-खो : पश्चिम रेल्वे अजिंक्य

गोरेगाव प्रबोधन येथे आयोजित २५व्या रौप्यमहोत्सवी मुंबई महापौर खो-खो चषक स्पर्धेत व्यावसायिक गटात पश्चिम रेल्वेने जेतेपदावर नाव कोरले. पश्चिम रेल्वेने गतविजेत्या मध्य रेल्वेचा १२-१० असा २ गुण आणि ५.३० मिनिटे राखून पराभव केला. सागर मालपने १.५० आणि २.३० तर अमोल जाधवने २.१०, १.३० मिनिटे नाबाद संरक्षण करताना २ गडीही बाद केले. याच गटात तृतीय क्रमांक मुंबई पोलिसांनी मिळवला. पुरुष विभागात उपांत्य चुरशीच्या सामन्यात उपनगरच्या महात्मा गांधी स्पोर्ट्स अकादमी संघाने श्री सह्य़ाद्री संघाला १४-१२ असे नमवले. मध्यंतराला मिळवलेली २ गुणांची आघाडी महात्मा गांधी स्पोर्ट्स अकादमीसाठी निर्णायक ठरली. दीपेश मोरेने २.४० मिनिटे संरक्षण करताना विजयात महत्त्वाची भूमिका बजावली. दुसऱ्या लढतीत ठाण्याच्या विहंग क्रीडा मंडळाने ओम समर्थ भारत व्यायाम मंदिराचा ३ गुणांनी पराभव केला.