धोनीला सन्मानाने निवृत्ती मिळायला हवी – अनिल कुंबळे

“धोनीने खेळावं की नाही याबद्दल मला नेमकं सांगता येणार नाही. यष्टीरक्षक-फलंदाज म्हणून ऋषभने टी-२० संघासाठी आपली दावेदारी सादर केली आहे. त्यामुळे धोनीबद्दलचा निर्णय आता एम.एस.के. प्रसाद यांच्या निवड समितीला घ्यायचा आहे. मात्र धोनीला सन्मानपूर्वक निवृत्ती मिळायला हवी, तो त्याचा हक्क आहे”, अनिल कुंबळेंनी एका मुलाखतीदरम्यान आपलं मत मांडलं.

धोनीला भारतीय संघात स्थान मिळावं की नाही हा निर्णय निवड समितीने घ्यायचा आहे. ऋषभ पंतला आतापर्यंत योग्य प्रमाणात संधी मिळाली आहे, मात्र त्याच्या कामगिरीतही सातत्य नाही. जर निवड समितीला धोनी टी-२० विश्वचषकासाठी संघात हवा आहे, तर त्यांनी त्याला संधी द्यायला हवी. मात्र, जर निवड समितीला धोनी टी-२० संघात नको असेल तर त्याला स्पष्टपणे सांगण गरजेचं आहे, कुंबळे धोनीच्या संघातील स्थानाबद्दल बोलत होते. विश्वचषकानंतर विंडीज दौऱ्यात धोनीने विश्रांती घेण पसंत केलं होतं. यानंतर आफ्रिकेविरुद्ध टी-२० मालिकेतही धोनीची भारतीय संघात निवड झालेली नाही.