Doug Bracewell : सचिन-सेहवागची विकेट पटकावलेल्या न्यूझीलंडच्या गोलंदाजावर बंदी, कोकेन सेवन केल्याप्रकरणी आढळला दोषी

डग ब्रेसवेलवर एका महिन्याची बंदी –

स्पोर्ट्स इंटिग्रिटी कमिशनला त्यांच्या तपासणीत असे आढळून आले की, डग ब्रेसवेलने कोकेनचे सेवन केले होते, परंतु त्याचा त्याच्या क्रिकेट कामगिरीशी काहीही संबंध नव्हता. आम्ही तुम्हाला आठवण करून देतो की, वेलिंग्टनविरुद्धच्या त्या सामन्यात ब्रेसवेलने २१ धावांत २ बळी घेतले होते आणि ११ चेंडूत ३० धावांची तुफानी खेळी खेळून आपल्या संघाला ६ गडी राखून विजय मिळवून देण्यात महत्त्वपूर्ण योगदान दिले होते. दोषी आढळल्यानंतर, ब्रेसवेलवर सुरुवातीला तीन महिन्यांची बंदी घालण्यात आली होती, जी नंतर एक महिन्यावर कमी करण्यात आली. कारण त्याने सुधारक केंद्रात एक महिना घालवला होता.

न्यूझीलंड क्रिकेटच्या मुख्य कार्यकारी अधिकाऱ्यांनी डग ब्रेसवेलच्या कृतीबद्दल निराशा व्यक्त केली, पण तरीही बोर्ड त्याच्या क्रिकेट कारकिर्दीला पाठिंबा देईल. ब्रेसवेलने आपली चूक मान्य केली आहे. डग ब्रेसवेलची कारकीर्द मैदानाबाहेर वादग्रस्त घटनांनी भरलेली आहे. वयाच्या १८व्या वर्षापासून त्याला अशा घटनांनी घेरले आहे. दारूच्या नशेत गाडी चालवताना त्याला अनेकवेळा पकडण्यात आले आहे. २०१० ते २०१७ पर्यंत अशा घटनांमुळे तो अनेकवेळा चर्चेत आला होता.

हेही वाचा – AUS vs PAK : ऑस्ट्रेलियाने पाकिस्तानला सलग तिसऱ्या सामन्यात धूळ चारत केला विश्वविक्रम! ‘या’ बाबतीत न्यूझीलंडला टाकले मागे

सचिन, सेहवाग, रोहितसारख्या दिग्गजांची घेतलीय विकेट –

न्यूझीलंडच्या या दिग्गज वेगवान अष्टपैलू खेळाडूने भारतातील अनेक दिग्गजांची विकेट घेण्यात यश मिळवले आहे. ब्रेसवेलने टीम इंडियाचा महान फलंदाज सचिन तेंडुलकर, वीरेंद्र सेहवाग आणि माजी कर्णधार रोहित शर्मासारख्या फलंदाजांना बाद केले आहे. ब्रेसवेलने सलामीवीर फलंदाज रोहित शर्माविरुद्ध आतापर्यंत ४ डावांत गोलंदाजी केली असून, त्यात त्याने दोनदा रोहितला बाद केले आहे. तसेच, त्याने ३ डावांपैकी २ वेळा सेहवागला बाद केले. याशिवाय भारताचा दिग्गज फलंदाज सचिनला एकदा पॅव्हेलियनचा रस्ता दाखवण्यातही ब्रेसवेल यशस्वी ठरला होता.

हेही वाचा – Gautam Gambhir : गौतम गंभीरला दिल्ली उच्च न्यायालयाचा दणका! ‘या’ प्रकरणातील निर्दोष मुक्तता करण्याच्या आदेशाला स्थगिती

डग ब्रेसवेलची आंतरराष्ट्रीय कारकीर्द –

डग ब्रेसवेलने आपल्या आंतरराष्ट्रीय कारकिर्दीत न्यूझीलंडकडून २८ कसोटी सामन्यांमध्ये ७४ विकेट्स घेण्यासोबतच ५६८ धावा केल्या. त्याच्या नावावर २१ एकदिवसीय सामन्यांमध्ये २६ विकेट्स आणि २२१ धावा आहेत आणि एकदिवसीय क्रिकेटमध्ये त्याने अर्धशतकही झळकावले आहे. त्याने २० टी-२० सामन्यात २० विकेट्स घेतल्या आहेत.