विजयासाठीचे ३६३ धावांचे आव्हान पार करताना श्रीलंकेचा दुसरा डाव १९५ धावांवर संपुष्टात आणत न्यूझीलंडने दुसरी कसोटी जिंकून दोन सामन्यांची ही मालिका १-१ अशी बरोबरीत सोडवली.
जानेवारी महिन्यानंतर न्यूझीलंडने पहिल्या कसोटी विजयाची नोंद केली. अँजेलो मॅथ्यूजने ८४ धावांची खेळी करत न्यूझीलंडचा विजय लांबवला. अखेर पाचव्या दिवशी चहापानानंतर श्रीलंकेचे तीन बळी मिळवत न्यूझीलंडने विजय साकारला. प्रसन्ना जयवर्धने याने २९ धावांची खेळी करत त्याला साथ दिली. न्यूझीलंडतर्फे टिम साऊदी आणि ट्रेन्ट बोल्ट यांनी प्रत्येकी तीन बळी मिळवले. पहिल्या डावात शतक झळकावणारा न्यूझीलंडचा कर्णधार रॉस टेलर सामनावीराचा मानकरी ठरला.