IND vs AUS: “मी टेन्शनमध्ये होतो, पण सिराजने…”, नितीश रेड्डीच्या वडिलांची लेकाच्या शतकावर पहिली प्रतिक्रिया, सिराजचा उल्लेख करत काय म्हणाले?

नितीश रेड्डीच्या वडिलांनी त्याच्या शतकानंतर आपल्या मनातील भावना व्यक्त केल्या आहे. नितीश रेड्डीच्या वडिलांशी स्टेडियममध्येच एडम गिलक्रिस्टने संवाद साधला. नितीशचे वडिल इंग्रजीमध्ये फार काही बोलू शकले नाहीत. पण लेकाच्या शतकाबद्दल बोलताना म्हणाले, “आमच्या कुटुंबासाठी हा खूपच खास दिवस आहे आणि आमच्या आयुष्यात हा दिवस आम्ही हा दिवस कधीच विसरणार नाही. तो १४-१५ वर्षांचा असल्यापासूनच चांगली कामगिरी करत आहे आणि आता आंतरराष्ट्रीय क्रिकेटमध्येही, खूप महत्त्वाचा आणि खास क्षण आहे.”

हेही वाचा – IND vs AUS: नितीश रेड्डीचं पहिलं कसोटी शतक! ऑस्ट्रेलियाच्या गोलंदाजांसमोर एकटा उभा ठाकला; वडिलांच्या डोळ्यातून आनंदाश्रू

नितीश रेड्डी ९९ धावांवर होता आणि जेव्हा सिराजकडे स्ट्राईक होती तेव्हा त्याच्या वडिलांच्या मनात काय सुरू होतं, हे सांगताना म्हणाले, “मी खूप टेन्शनमध्ये होतो. फक्त शेवटची विकेट बाकी होती. सिराजचे आभार तो चांगला खेळला आणि त्याने विकेट वाचवली.” नितीशचे वडिल मुत्याला रेड्डी प्रचंड भावुक दिसले. नितीशच्या वडिलांबरोबरच त्याचे काकाही तिथे उपस्थित होते आणि त्याचं संपूर्ण कुटुंबही ऑस्ट्रेलियामध्ये सामना पाहण्यासाठी हजर होतं.

हेही वाचा – IND vs AUS: नितीश रेड्डीचा दुर्मिळ विक्रम, ऑस्ट्रेलियाविरूद्ध ‘ही’ कामगिरी करणारा पहिलाच भारतीय फलंदाज

नितीश रेड्डीचं सर्वच स्तरावरून कौतुक होत आहे. ऑस्ट्रेलियाच्या जबरदस्त आणि भेदक गोलंदाजी आक्रमणासमोर मोक्याच्या क्षणी हे कसोटी शतक झळकावणं काही साधी गोष्ट नव्हती. पण नितीश रेड्डीने भारताचा डाव उचलून धरत एक चांगली धावसंख्या उभारली आहे. तिसऱ्या दिवसाचा खेळ संपेपर्यंत भारताने ९ बाद ३५८ धावा केल्या आहेत. अजूनही भारतीय संघ ऑल आऊट झालेला नाही. भारताकडून नितीश रेड्डी १०५ धावा तर मोहम्मद सिराज २ धावा करून मैदानावर कायम आहे. यासह ऑस्ट्रेलियाचा संघ अजूनही ११६ धावा पुढे आहे.