अबब! वन-डे सामन्यात ठोकले १३ षटकार; मोडला जयसूर्याचा विक्रम

जयसूर्याने एका सामन्यात सर्वाधिक ११ षटकार खेचत सर्वाधिक षटकार मारणारा श्रीलंकेचा खेळाडू म्हणून विक्रम केला होता. तो विक्रम थिसारा परेराने मोडीत काढला. न्यूझीलंडविरुद्धच्या एकदिवसीय सामन्यात परेराने तब्बल १३ षटकार लगावले.

दुसऱ्या एकदिवसीय सामन्यात न्यूझीलंडने श्रीलंकेपुढे ३२० धावांचे आव्हान ठेवले होते. या आव्हानाचा पाठलाग करताना श्रीलंकेचा निम्मा संघ स्वस्तात बाद झाला. त्यानंतर परेराची ही झंझावाती खेळी पाहायला मिळाली. परेराने या खेळीमध्ये फक्त ७४ चेंडूंमध्ये १३ षटकारांच्या मदतीने तब्बल १४० धावांची तुफानी खेळी साकारली. पण परेराच्या या खेळीनंतरही श्रीलंकेला हा सामना जिंकता आला नाही. श्रीलंकेचा डाव २९८ धावांमध्ये संपुष्टात आला आणि न्यूझीलंडने सामना २१ धावांनी जिंकत एकदिवसीय मालिकेत २-० अशी विजयी आघाडी घेतली.