नवी दिल्ली : सलामीच्या लढतीत पराभूत झाल्यानंतर दमदार पुनरागमन करणाऱ्या इंग्लंडच्या संघाचे एकदिवसीय विश्वचषक क्रिकेट स्पर्धेत आज, रविवारी अफगाणिस्तानवर मोठा विजय मिळवून निव्वळ धावगती वाढवण्याचे लक्ष्य असेल.
गतविजेत्या इंग्लंडला विश्वचषकाच्या पहिल्या सामन्यात न्यूझीलंडकडून लाजिरवाणा पराभव पत्करावा लागला होता. न्यूझीलंडने हा सामना नऊ गडी राखून सहज जिंकला होता. मात्र, इंग्लंड संघाने विजयी पुनरागमन करताना बांगलादेशवर १३७ धावांनी मात केली. आता ही लय अफगाणिस्तानविरुद्ध कायम राखण्याचा इंग्लंडचा प्रयत्न असेल. हा सामना दिल्लीतील अरुण जेटली स्टेडियमवर होणार आहे. या स्टेडियमवरील पहिल्या सामन्यात दक्षिण आफ्रिकेने ५ बाद ४२८ अशी विश्वचषक विक्रमी धावसंख्या उभारली होती आणि श्रीलंकेने ३२६ धावांपर्यंत मजल मारली होती. या स्टेडियमवरील पुढील सामन्यात अफगाणिस्तानने दिलेले २७३ धावांचे लक्ष्य भारताने ३५ षटकांतच गाठले होते. त्यामुळे इंग्लंडचाही रविवारी होणाऱ्या लढतीत मोठी धावसंख्या उभारण्याचा प्रयत्न असेल.
वेळ : दु. २ वा.
थेट प्रक्षेपण : स्टार स्पोर्टस १, २, १ हिंदी, हॉटस्टार (मोफत)
