Vinesh Phogat Disqualified: “विनेश फोगटकडून काहीतरी चूक…”, बॅडमिंटनपटू, भाजपा नेत्या सायना नेहवालचं मोठं वक्तव्य

पुढच्या वेळी पदकासाठी प्रयत्न करावा

सायना नेहवालने एनडीटीव्हीशी बोलताना म्हटले की, विनेश फोगटच्या अपात्रप्रकरणामुळे संपूर्ण देशाला धक्का बसला आहे. मागच्या दोन-तीन दिवसांपासून मी तिच्या विजयाची कामना करत होते. या क्षणासाठी प्रत्येक खेळाडूला तयार करण्यात येत असते. याक्षणी काय भावना असतात, हे मी समजू शकते. एका खेळाडूसाठी हे शब्दात न सांगता येणारे आहे. कदाचित वजन अचानक वाढले असेल. ती योद्धा आहे आणि यावर ती नक्कीच मात करेल. पुढच्या वेळी पदक मिळेल, याचा तिने नक्कीच प्रयत्न करावा.

हे वाचा >> Vinesh Phogat Disqualification: “विनेश फोगटला जे जे हवं होतं ते सगळं…”, केंद्रीय क्रीडामंत्र्यांचं लोकसभेत निवेदन; म्हणाले, “तिथे रोज सकाळी…”

कुठेतरी चूक झाली

“विनेश अनुभवी कुस्तीपटू आहे. तिला बरोबर आणि चूक आहे. मला कुस्तीबद्दल फारसे कळत नाही. तिने नक्की काय चूक केली आणि तेही शेवटच्या दिवशी, याबद्दलही माझ्याकडे माहिती नाही. मी तिला नेहमीच प्रचंड मेहनत करताना पाहिले आहे. तिने तिचे १०० टक्के दिलं. पण अशा मोठ्या स्पर्धेत मोक्याच्या क्षणी चूक होत नाही. हे कसे झाले, यावर मोठे प्रश्नचिन्ह आहे. विनेशसाठी मोठी टीम होती. प्रशिक्षक, फिजियो, ट्रेनर्स असतानाही, असे घडले. त्यामुळे त्यांनाही वाईट वाटत असेलच. मला कुस्तीचे नियम माहीत नसले तरी एक खेळाडू म्हणून वाईट वाटत आहे”, असेही विधान सायना नेहवाल यांनी केले.

सायना नेहवालने भारताला ऑलिम्पिकमध्ये बॅटमिंटनसाठी पहिले पदक मिळवून दिले होते. तसेच २०२० साली तिने भाजपामध्ये प्रवेश केला होता.

हे ही वाचा >> Paris Olympic 2024 Live, Day 12: विनेश फोगट ऑलिम्पिकमध्ये ठरली अपात्र, चानू-अविनाशकडून भारताला पदकाची अपेक्षा

विनेशकडूनही काहीतरी चुकलं असावं

सायना नेहवाल एनडीटीव्हीशी बोलताना पुढे म्हणाली, “विनेशची ही पहिली ऑलिम्पिक स्पर्धा नव्हती. ती तिसऱ्यांदा ऑलिम्पिकमध्ये सहभागी झाली होती. एक खेळाडू म्हणून तिला सर्व नियम माहीत आहेत. पण नक्की काहीतरी चूक झाली आहे. दुसऱ्या कुणाही खेळाडूबरोबर असे झालेले मी कधी ऐकलं नाही. वजन वाढल्यामुळे अपात्र ठरल्याचे आजवर माझ्यातरी ऐकिवात नाही. ती अनुभवी खेळाडू आहे, तरीही विनेशच्या बाजूनंही काहीतरी चुकलं असावं. तिनं याचा दोष स्वीकारला पाहीजे. एवढ्या मोठ्या सामन्याआधी अशा चुका करणं योग्य नाही.”

मंगळवारी तीन मोठे विजय

मंगळवारी (६ ऑगस्ट) विनेश फोगटने तीन सामन्यात विजय मिळविला होता. २९ वर्षीय विनेश फोगटचे आधीच्या तीनही सामन्यात वजन ५० किलोच्या आत होते. विनेश फोगटने पॅरिस ऑलिम्पिकमध्ये महिलांच्या ५० किलो वजनी गटातील कुस्तीच्या राऊंड ऑफ १६ च्या सामन्यात जपानच्या युई सुसाकीचा ३-२ असा पराभव करून मोठा धक्का दिला. चार वेळा विश्वविजेत्या सुसाकीने टोकियो ऑलिम्पिकमध्ये सुवर्णपदक जिंकले होते. आंतरराष्ट्रीय कुस्तीतील जपानी कुस्तीपटूचा हा पहिलाच पराभव होता, ज्यामुळे विनेशचे यश आणखीनच खास झाले होते. संपूर्ण सामन्यात विनेश फोगट २-० ने पिछाडीवर सामना अवघ्या काही सेकंदांवर येऊन पोहोचला होता. विनेश पराभूत होणार असंच दिसत होतं, पण शेवटची १० सेकंदापेक्षा कमी वेळ बाकी असताना विनेशने सामना पालटला आणि ३-२ फरकाने दणदणीत विजय मिळवला.

आणखी वाचा >> Vinesh Phogat : व्यायाम केला, केस कापले, रक्त काढलं तरीही.., विनेश फोगटने वजन कमी करण्यासाठी केले ‘हे’ प्रयत्न

आपल्या कारकिर्दीतले तिसरे ऑलिम्पिक खेळत असलेल्या विनेशने तिच्या अनुभवाचा पुरेपूर वापर केला आणि शेवटच्या पाच सेकंदात जपानच्या चॅम्पियन कुस्तीपटूला नमवून दोन गुण मिळवण्यात यश मिळवले. जपान संघानेही या विरोधात अपील केले पण रेफ्रींनी व्हिडिओ रिप्ले पाहिल्यानंतर तो फेटाळला, त्यामुळे विनेशला आणखी एक गुण मिळाला आणि तिने ३-२ असा विजय मिळवला. यानंतर युक्रेनची ओक्साना लिवाच हिचा उपांत्यपूर्व फेरीत पराभव केला. लिवाचने खूप प्रयत्न केले पण शेवटी विनेशने (Vinesh Phogat) आपली पकड मजबूत ठेवत विजय मिळवला. विनेशने उपांत्यपूर्व सामना ७-५ च्या फरकाने जिंकला.