विश्वचषकासाठी संघात केवळ एक जागा शिल्लक!! कर्णधार विराटचे सूचक संकेत

“माझ्या मते एका जागेसाठी ही शर्यत असेल. ३ गोलंदाजांनी संघात आपलं स्थान कमी-अधिक प्रमाणात पक्क केलं आहे. त्यामुळे उरलेल्या एका जागेसाठी कोणता खेळाडू बाजी मारतो हे पाहणं औत्सुक्याचं ठरणार आहे.” विराट भारत विरुद्ध विंडीज यांच्यातील पहिल्या टी-२० सामन्याआधी हैदराबादमध्ये पत्रकारांशी बोलत होता.

जलदगती गोलंदाजांसाठी भारतीय संघात असलेल्या शर्यतीवर विराटने समाधान व्यक्त केलं. “मी याला कोणत्याही दृष्टीकोनातून समस्या मानत नाही. माझ्या मते भुवनेश्वर आणि बुमराह चांगले गोलंदाज आहेत. टी-२० क्रिकेटमध्ये त्यांची कामगिरी ही सातत्यपूर्ण आहे. दीपक चहरनेही गेल्या काही दिवसांत चांगली कामगिरी केली आहे. पुनरागमनानंतर शमीनेही चांगली कामगिरी केली आहे. जर तो चांगल्या फॉर्मात आला आणि टी-२० क्रिकेटच्या गरजेनुसार त्याने गोलंदाजी केली, तर ऑस्ट्रेलियात तो संघासाठी नक्कीच फायदेशीर ठरु शकतो. नव्या चेंडूवर शमी चांगल्या पद्धतीने विकेट घेतो, याचसोबत तो यॉर्कर चेंडूही टाकतो.” विराटच्या या वक्तव्यानंतर भारतीय संघात कोणता गोलंदाज टी-२० विश्वचषकासाठी आपली जागा नक्की करतो हे पाहणं महत्वाचं ठरणार आहे.