Pakistan vs Afghanistan ICC Cricket World Cup 2023 Match Updates: अफगाणिस्तानने विश्वचषकाच्या २२व्या सामन्यात पाकिस्तानचा ८ गडी राखून पराभव केला आहे. या विश्वचषकातील पाकिस्तानला हा मोठा धक्का आहे. चेन्नईच्या एमए चिदंबरम स्टेडियमवर नाणेफेक जिंकून फलंदाजी करताना पाकिस्तानने २८२ धावा केल्या होत्या. अफगाणिस्तानने दोन गडी गमावून २८६ धावा केल्या आणि सामना जिंकला. त्यामुळे आता पाकिस्तान संघाच्या अडचणी वाढल्या आहेत. त्याचबरोबर या विजयानंतर अफगाणिस्तान संघाने गुणतालिकेत मोठी झेप घेतली आहे. या सामन्यापूर्वी अफगाणिस्तानचा संघ गुणतालिकेत शेवटच्या स्थानावर होता, मात्र आता तो सहाव्या स्थानावर पोहोचला आहे.
अफगाणिस्तानने पाकिस्तानचा आठ गडी राखून पराभव केला आहे. या विश्वचषकातील हा तिसरा मोठा धमाका आहे. याआधी अफगाणिस्तानने इंग्लंडचा पराभव केला होता, तर दक्षिण आफ्रिकेला नेदरलँडविरुद्ध पराभवाचा सामना करावा लागला होता. या सामन्यात पाकिस्तानने प्रथम फलंदाजी करताना ७ गडी गमावून २८२ धावा केल्या होत्या. प्रत्युत्तरात अफगाणिस्तानने ४९ षटकांत दोन गडी गमावून २८६ धावा केल्या आणि सामना आठ विकेट्स राखून जिंकला. पाकिस्तानकडून बाबरने ७४ धावा आणि अब्दुल्ला शफीकने ५८ धावांची खेळी केली. त्याचवेळी अफगाणिस्तानसाठी इब्राहिम झद्रानने ८७ धावा, रहमत शाहने नाबाद ७७ आणि रहमानउल्ला गुरबाजने ६५ धावा केल्या. कर्णधार शाहिदीने नाबाद ४८ धावा केल्या.
पाकिस्तानकडून बाबर आझम आणि अब्दुल्ला शफीक यांनी अर्धशतके झळकावली. बाबरने सर्वाधिक ७४ धावा केल्या. अब्दुल्ला शफीकने ५८ धावांची खेळी केली. अखेरच्या षटकांमध्ये शादाब खान आणि इफ्तिखार अहमद यांनी शानदार फलंदाजी करत संघाला २८२ धावांपर्यंत नेले. दोघांनी ४०-४० धावांचे योगदान दिले. सौद शकीलने २५ आणि इमाम उल हकने १७ धावा केल्या. मोहम्मद रिझवानला केवळ आठ धावा करता आल्या. शाहीन आफ्रिदी तीन धावा करून नाबाद राहिला. अफगाणिस्तानकडून नूर अहमदने तीन आणि नवीन उल हकने दोन गडी बाद केले. मोहम्मद नबी आणि अजमतुल्ला उमरझाई यांना प्रत्येकी एक विकेट घेतली.
२८३ धावांच्या लक्ष्याचा पाठलाग करताना अफगाणिस्तानची सुरुवात चांगली झाली. गुरबाज आणि इब्राहिम यांनी पॉवरप्लेमध्येच ६० धावा जोडल्या. या दोघांनी पहिल्या विकेटसाठी १३० धावांची भागीदारी केली. गुरबाज ६५ धावा करून बाद झाला. यानंतर इब्राहिमने रहमत शाहच्या साथीने ६० धावांची भर घातली. इब्राहिम ८७ धावांवर बाद झाला, पण यानंतर अफगाणिस्तानने एकही विकेट गमावली नाही. शाहिदी आणि रहमत शाह यांनी तिसऱ्या विकेटसाठी नाबाद ९६ धावांची भागीदारी करत अफगाणिस्तानला ऐतिहासिक विजय मिळवून दिला. विश्वचषकात पहिल्यांदाच अफगाणिस्तान संघाने दोन सामने जिंकले आहेत. त्याचवेळी, एकदिवसीय सामन्यात पाकिस्तानला पहिल्यांदाच अफगाणिस्तानविरुद्ध पराभवाचा सामना करावा लागला आहे. आता पाकिस्तानचा संघ सलग तीन सामने हरला आहे.
