IND A vs PAK A, Emerging Asia Cup Final 2023: पुरुषांच्या इमर्जिंग आशिया चषक स्पर्धेच्या अंतिम फेरीत भारत अ संघाचा पाकिस्तान अ संघाशी सामना संपन्न झाला. श्रीलंकेतील कोलंबोमध्ये प्रेमदासा स्टेडियमवर पार पडलेल्या सामन्यात भारतीय संघाचा १२८ धावांनी दारूण पराभव झाला. पाकिस्तानी गोलंदाजांसमोर टीम इंडियाच्या फलंदाजांनी सपशेल लोटांगण घातले. भारतीय संघाने नाणेफेक जिंकून प्रथम गोलंदाजी करण्याचा निर्णय घेतला आणि तो टीम इंडियाला महागात पडला. पाकिस्तान अ संघाने ५० षटकांत ८ बाद ३५२ धावा केल्या होत्या. प्रत्युत्तरात भारत अ संघाचा डाव २२४ धावांवर आटोपला. या विजयासह पाकिस्तानच्या युवा खेळाडूंनी इमर्जिंग आशिया चषक २०२३ आपले नाव कोरले.
पाकिस्तानने इमर्जिंग आशिया चषकाचे विजेतेपद पटकावले आहे. कोलंबो येथे खेळल्या गेलेल्या अंतिम सामन्यात त्याने भारताचा १२८ धावांनी पराभव केला. भारतीय कर्णधार यश धुलने नाणेफेक जिंकून प्रथम गोलंदाजी करण्याचा निर्णय घेतला. प्रथम फलंदाजी करताना पाकिस्तानने ५० षटकांत आठ गडी गमावून ३५२ धावा केल्या. तैयब ताहिरने ७१ चेंडूत १०८ धावांची खेळी केली. प्रत्युत्तरात भारतीय संघ ४० षटकांत २२४ धावात गारद झाला. अभिषेक शर्मा वगळता एकाही भारतीय फलंदाजाला ५०+ धावा करता आल्या नाहीत. अभिषेकने ५१ चेंडूत ६१ धावांची खेळी खेळली.
इमर्जिंग आशिया कपमध्ये पाकिस्तानचे हे सलग दुसरे विजेतेपद आहे. यापूर्वी ही स्पर्धा २०१९ मध्ये खेळवली गेली होती. त्यानंतर पाकिस्तानने अंतिम फेरीत बांगलादेशचा पराभव करून विजेतेपद पटकावले. सलग दोनदा हे विजेतेपद पटकावणारा पाकिस्तान हा दुसरा संघ ठरला आहे. त्याच्या आधी श्रीलंकेने ही कामगिरी केली होती. २०१७ आणि २०१८ मध्ये श्रीलंकेने इमर्जिंग आशिया कपचे विजेतेपद सलग दोनदा जिंकले. ही स्पर्धा २०१३ मध्ये सुरू झाली होती. पहिल्या आवृत्तीत भारताने सूर्यकुमारच्या नेतृत्वाखाली विजेतेपद पटकावले होते. आतापर्यंत काही पाच आवृत्त्या खेळल्या गेल्या आहेत आणि टीम इंडियाने फक्त एकदाच (२०१३) विजय मिळवला आहे. त्याचबरोबर श्रीलंका आणि पाकिस्तानने प्रत्येकी दोनदा विजेतेपद पटकावले आहे. यापूर्वी २०१८ मध्येही टीम इंडियाला फायनलमध्ये श्रीलंकेकडून पराभव पत्करावा लागला होता.
अंतिम फेरीत पराभव, टीम इंडियाचा या आवृत्तीतील पहिला पराभव
इमर्जिंग आशिया चषकाच्या या आवृत्तीत अंतिम फेरीतील पराभव हा टीम इंडियाचा पहिला पराभव होता. ग्रुप स्टेजमध्ये भारताने पहिल्या सामन्यात UAE-A संघाचा आठ विकेट्स राखून पराभव केला आणि दुसऱ्या सामन्यात टीम इंडियाने नेपाळचा नऊ विकेट्स राखून पराभव केला. तिसरा सामना भारत आणि पाकिस्तान यांच्यात झाला. यश धुल नेतृत्वाखाली भारतीय संघाने हा सामना आठ विकेट्स राखून जिंकला. त्यात साई सुदर्शनने शतकी खेळी खेळली होती. भारताने उपांत्य फेरीत बांगलादेशचा ५१ धावांनी पराभव केला. भारताचा या स्पर्धेतील एकमेव पराभव पाकिस्तानविरुद्धच्या अंतिम सामन्यात झाला.
कसा होता पाकिस्तानचा या स्पर्धेतील प्रवास?
त्याचवेळी पाकिस्तानने पहिल्या सामन्यात नेपाळचा चार विकेट्सने पराभव केला. दुसऱ्या सामन्यात पाकिस्तानने यूएईचा १८४ धावांनी पराभव केला. तिसऱ्या सामन्यात भारताकडून पराभूत झाल्यानंतर पुनरागमन करताना पाकिस्तानने उपांत्य फेरीत श्रीलंका-अ संघाचा ६० धावांनी पराभव केला. आता फायनलमध्ये भारताचा पराभव करून ग्रुप स्टेजमधील पराभवाचाही बदला घेतला.
