‘बाबर’युगाचा प्रारंभ..! विराट, रोहितला दणका देत पाकिस्तानाच्या कर्णधारानं…

केवळ टी-२० मध्येच नव्हे, तर एकदिवसीय क्रमवारीतही बाबर पहिल्या स्थानावर आहे. तो आधीच आयसीसी फलंदाजांच्या क्रमवारीत पहिल्या क्रमांकावर आहे. आझमने यावर्षी एप्रिलमध्ये भारतीय कर्णधार विराट कोहलीच्या पुढे क्रमवारीत अव्वल स्थान पटकावले होते. एकदिवसीय क्रमवारीत आझमचे ८७३ गुण आहेत, तर कोहली आणि रोहित शर्मा अनुक्रमे ८४४ आणि ८१३ गुण आहेत.

बाबर आझमने टी-२० वर्ल्डकपमध्ये पाकिस्तानसाठी महत्त्वाची भूमिका बजावली आहे. त्याने चार डावात १२४.५२च्या स्ट्राईक रेटने ६६ च्या सरासरीने १९८ धावा केल्या आहेत. गेल्या आठवड्याच्या क्रमवारीत दुसऱ्या स्थानावर असलेल्या बाबरने १४ गुणांची आघाडी घेतली आणि डेव्हिड मलानला मागे टाकले. मलान ८३१ वरून ९९८ गुणांवर घसरला. जेसन रॉय सहा स्थानांनी प्रगती करत १४व्या, डेव्हिड मिलर सहा स्थानांनी प्रगती करत ३३व्या आणि दक्षिण आफ्रिकेचा कर्णधार टेंबा बावुमा ५२व्या स्थानावर पोहोचला आहे.

हेही वाचा – IND vs AFG: सामना कधी, कुठे कसा पाहता येणार? संभाव्य संघ कसा असणार? कोणाला संधी मिळणार?

टी-२० क्रमवारीत तिसऱ्या स्थानावर ऑस्ट्रेलियाचा कर्णधार अॅरॉन फिंच आहे. पाकिस्तानचा मोहम्मद रिझवान टी-२० क्रमवारीत चौथ्या स्थानावर असून त्याचे ७३१ गुण आहेत. भारतीय कर्णधार विराट कोहली ७१४ गुणांसह पाचव्या स्थानावर आहे. या यादीत भारताचा लोकेश राहुल ६७८ गुणांसह आठव्या क्रमांकावर आहे.

हसरंगा अव्वल

टी-२० गोलंदाजी क्रमवारीत श्रीलंकेचा वानिंदू हसरंगा अव्वल स्थानावर आहे. वनिंदू हसरंगा हा एका कॅलेंडर वर्षात आंतरराष्ट्रीय टी-२० मध्ये सर्वाधिक विकेट घेणारा गोलंदाज आहे. तो टी-२० विश्वचषक स्पर्धेत उत्कृष्ट फॉर्ममध्ये आहे आणि १४ विकेट्ससह आघाडीवर आहे. ९ धावांत ३ बळी ही त्याची सर्वोत्तम कामगिरी आहे. या यादीत दक्षिण आफ्रिकेचा तबरेझ शम्सी ७७० गुणांसह दुसऱ्या क्रमांकावर असून तिसऱ्या क्रमांकावर इंग्लंडचा आदिल रशीद आहे. अफगाणिस्तानचा स्टार फिरकी गोलंदाज राशिद खान आणि मुजीब उर रहमान अनुक्रमे चौथ्या आणि पाचव्या क्रमांकावर आहेत.