पाकिस्तानी पोलिसांचा चॅम्पियन्स ट्रॉफीदरम्यान सेवा देण्यास नकार; १०० हून अधिक कर्मचारी बडतर्फ, नेमकं प्रकरण काय?

पंजाब पोलीस दलातील एका अधिकाऱ्याने सांगितलं की “चॅम्पियन्स करंडक स्पर्धेदरम्यान अनेकदा काही पोलीस कर्मचारी कर्तव्यावर हजर राहिले नाहीत. गैरहजेरीचे अनेक प्रकार आढळले आहेत. अशा बेजबाबदार पोलीस कर्मचाऱ्यांना सेवेतून बडतर्फ करण्यात आलं आहे. तर, काही पोलीस कर्मचाऱ्यांनी त्यांना सोपवण्यात आलेली जबाबदारी पार पाडण्यास स्पष्टपणे नकार दिला आहे. वेगवेगळ्या संघांना लाहोरमधील गद्दाफी स्टेडियममधून हॉटेल्सकडे जाताना सुरक्षा पुरवण्यासाठी पोलीस अधिकारी तैनात करण्यात आले आहेत. मात्र, या पोलिसांपैकी अनेकजण गैरहजर असल्याचं निदर्शनास आलं आहे. तर, काहींनी ही जबाबदारी घेण्यास थेट नकार दिला. या पोलीस कर्मचाऱ्यांवर कारवाई करण्यात आली आहे.

या पोलीस अधिकाऱ्यांनी सांगितलं की पंजाबचे पोलीस महानिरीक्षक उस्मान अन्वर यांनी या प्रकरणाची गंभीर दखल घेतली असून संबंधित पोलिसांवर कडक कारवाई करण्याचे निर्देश त्यांनी दिले आहेत. अशा आंतरराष्ट्रीय स्पर्धेच्या सुरक्षेचा प्रश्न असताना अशा प्रकरणाच्या निष्काळजीपणाला थारा नसावा, असं अन्वर यांनी सर्व पोलीस अधिकाऱ्यांना सांगितलं आहे.

सेवा देण्यास पोलिसांनी नकार देण्याचं कारण काय?

या कारवाईबाबत कोणत्याही प्रकारचं अधिकृत वक्तव्य अथवा निवेदन समोर आलेलं नाही. त्याचबरोबर बडतर्फ करण्यात आलेल्या पोलिसांनी त्यांचं कर्तव्य बजावण्यास नकार का दिला हे देखील समजलेलं नाही. पाकिस्तानमधील काही स्थानिक माध्यमांनी दावा केला आहे की हे पोलीस गेल्या कित्येक महिन्यांपासून सेवा देत आहेत. तसेच चॅम्पियन्स करंडक स्पर्धेदरम्यान त्यांचे कामाचे तास वाढले आहेत, त्यांच्यावरील जबाबदाऱ्या वाढल्या आहेत. अनेकांना आठवड्याच्या रजा मिळालेल्या नाहीत. त्यामुळे पोलीस कर्मचाऱ्यांमध्ये नाराजीचं वातावरण आहे.