India vs Spain Hockey Paris Olympics 2024 : पॅरिस ऑलिम्पिक २०२४ मध्ये भारताच्या हॉकी संघाने कांस्यपदक जिंकलं आहे. त्यामुळे यंदाच्या ऑलिम्पिकमध्ये भारताला चौथ पदक मिळालं आहे. भारताने या सामन्यामध्ये स्पेनचा २-१ अशा फरकाने पराभव केला आणि हॉकी संघानं कांस्यपदक पटकावलं. या विजयामुळे पॅरिस ऑलिम्पिकमध्ये भारतीय हॉकी संघाने इतिहास घडवला. कारण संघाने सलग दुसऱ्यांदा कांस्यपदक जिंकलं आहे. याआधी त्यांनी टोकियो ऑलिम्पिकमध्येही कांस्यपदक जिंकवलं होतं. पॅरिस ऑलिम्पिकमध्ये भारताच्या हॉकी संघाने कांस्यपदक जिंकल्यानंतर पंतप्रधान नरेंद्र मोदी यांनी हॉकी संघाचं कौतुक करत अभिनंदन केलं आहे. तसेच "पुढच्या पिढ्यांसाठी जपला जाईल असा हा पराक्रम आहे", असं पंतप्रधान नरेंद्र मोदी (PM Narendra Modi) यांनी म्हटलं आहे. हेही वाचा : हॉकी संघाने सलग दुसऱ्यांदा कोरलं कांस्यपदकावर नाव; श्रीजेशच्या कारकीर्दीचा गोड शेवट A feat that will be cherished for generations to come! The Indian Hockey team shines bright at the Olympics, bringing home the Bronze Medal! This is even more special because it is their second consecutive Medal at the Olympics. Their success is a triumph of skill,…— Narendra Modi (@narendramodi) August 8, 2024 पंतप्रधान नरेंद्र मोदी काय म्हणाले? "पुढच्या पिढ्यांसाठी जपला जाईल असा पराक्रम! भारतीय हॉकी संघ ऑलिम्पिकमध्ये चमकला, कांस्यपदक जिंकले! हे आणखी खास आहे, कारण ऑलिम्पिकमधील त्यांचे हे सलग दुसरे पदक आहे. त्यांचे यश कौशल्य, चिकाटी आणि सांघिक भावनेचा विजय आहे. त्यांनी प्रचंड धैर्य आणि लवचिकता दाखवली. सर्व खेळाडूंचे अभिनंदन. प्रत्येक भारतीयाचा हॉकीशी भावनिक संबंध आहे आणि ही कामगिरी आपल्या देशातील तरुणांमध्ये हा खेळ अधिक लोकप्रिय करेल, असं पंतप्रधान नरेंद्र मोदी यांनी म्हटलं आहे. सलग दुसऱ्यांदा कांस्यपदक जिंकलं भारतीय हॉकी संघाच्या इतिहासात भारताने सलग दुसऱ्यांदा कांस्यपदक जिंकलं आहे. याआधी १९६८ आणि १९७२ च्या ऑलिम्पिकमध्येही भारताने कांस्यपदक जिंकलं होतं. भारताचा गोलकिपर म्हणजेच भारतीय हॉकी संघाची भिंत म्हटल्या जाणाऱ्या श्रीजेशचा हा अखेरचा आंतरराष्ट्रीय सामना होता. कांस्यपदकाला गवसणी घालत श्रीजेशच्या कारकीर्दीचा गोड शेवट झाला आहे.
