Ruturaj Gaikwad Wicketkeeping Video Viral : सध्या जगभरात आयसीसी टी-२० विश्वचषक २०२४ स्पर्धेचा थरार सुरु आहे. दरम्यान याच कालावधीत पुण्यातील गहुंजे स्टेडियमवर महाराष्ट्र प्रीमियर लीगचा दुसरा हंगाम खेळला जात आहे. आता या स्पर्धेतील पुणेरी बाप्पा संघाचा कर्णधार ऋतुराज गायकवाड छत्रपती संभाजी किंग्जविरुद्धच्या सामन्यात एका नवीन भूमिकेत दिसला, ज्याचा व्हिडीओ सोशल मीडियावर तुफान व्हायरल होत आहे.
छत्रपती संभाजी किंग्जविरुद्धच्या सामन्यात पुणेरी बाप्पाचा कर्णधार ऋतुराज गायकवाड विकेट कीपिंग करताना दिसला. इंटरनेटवर एक व्हिडिओ व्हायरल झाला आहे. यामध्ये ऋतुराज डायव्हिंग करत चेंडू पकडताना दिसत आहे. आयपीएल २०२४ मध्ये महेंद्रसिंग धोनीच्या जागी चेन्नई सुपर किंग्जचे कर्णधारपद भूषवणारा ऋतुराज गायकवाड यष्टिरक्षण करत असल्याचे पाहून, तो एमएस धोनी निवृत्त झाल्यानंतर विकेटकीपिंग करेल, असा अंदाज बांधला जात आहे.
मात्र, याबाबत आताच घाईने कोणताही अंदाज बांधणे योग्य ठरणार नाही. कारण आयपीएलसारख्या स्तरावर विकेटकीपिंग करणे सोपे नाही. या स्पर्धेत बऱ्याच खेळाडूंनू अर्धवेळ विकेटकीपरची जबाबदारी पार पाडली आहे. ज्यामध्ये अंबाती रायडूने मुंबई इंडियन्सच्या अर्धवेळ विकेटकीपरची भूमिका पार पडली आहे
हेही वाचा – T20 WC 2024 : भारतीय संघाला मोठा धक्का! सुपर ८ फेरीपूर्वी टी२० जागतिक क्रमवारीतील अव्वल फलंदाजाला दुखापत
ऋतुराज गायकवाडने शानदार फॉर्ममध्ये –
ऋतुराज गायकवाड विकेटकीपिंग करतानाचा व्हिडिओ स्पोर्ट्स १८ ने सोशल मीडिया प्लॅटफॉर्म एक्सवर शेअर केला होता. त्याचा व्हिडिओ तुम्ही खाली पाहू शकता. ऋतुराज गायकवाडने महाराष्ट्र प्रीमियर लीग २०२४ मध्ये बॅटने चांगली कामगिरी केली आहे. त्याने ८ सामन्यांच्या ७ डावात १६८.६० च्या स्ट्राईक रेटने आणि ४८.३३ च्या सरासरीने २९० धावा केल्या आहेत. ज्यात २ अर्धशतकांचा समावेश आहे.
ऋतुराज गायकवाडच्या संघाची अवस्था बिकट –
महाराष्ट्र प्रीमियर लीग २०२४ मधील ऋतुराज गायकवाडच्या संघाबद्दल बोलायचे, तर त्याचा संघ सहा संघांमध्ये सहाव्या स्थानावर आहे. पुणेरी बाप्पाने ८ पैकी फक्त २ सामने जिंकले आहेत. त्यांना ६ सामन्यात पराभवाचा सामना करावा लागला आहे. रत्नागिरी जेट्स ९ पैकी ५ सामने जिंकून गुणतालिकेत अव्वल स्थानावर आहे. त्याचबरोबर ९ पैकी ५ सामने जिंकून कोल्हापूर टस्कर्स दुसऱ्या स्थानावर आहे. छत्रपती संभाजी किंग्ज ९ पैकी ५ सामने जिंकून गुणतालिकेत तिसऱ्या स्थानावर आहे. ईगल नाशिक टायटन्स ९ पैकी ५ सामने जिंकून गुणतालिकेत चौथ्या स्थानावर आहे. रायगड रॉयल्स ८ पैकी ४ सामने जिंकून गुणतालिकेत पाचव्या क्रमांकावर आहे.
