Najam Sethi says not to play matches at Narendra Modi Stadium: पीसीबीचे अध्यक्ष नजम सेठी यांनी आयसीसीचे चेअरमन ग्रेग बार्कले यांच्यासमोर एक नवीन अट ठेवली आहे. तसेच त्यांनी एकदिवसीय विश्वचषकादरम्यान अहमदाबादच्या नरेंद्र मोदी स्टेडियमवर भारताविरुद्ध खेळण्याबद्दल आपली भीती व्यक्त केली आहे. पीटीआय या वृत्तसंस्थेने सूत्रांच्या हवाल्याने ही माहिती दिली आहे. पाकिस्तानला आपले सामने कोलकाता, चेन्नई आणि बेंगळुरू येथे खेळायचे आहेत. अहमदाबादच्या नरेंद्र मोदी स्टेडियमवर सामने खेळायचे नाहीत.
उल्लेखनीय म्हणजे, आयसीसीचे अध्यक्ष ग्रेग बार्कले आणि आयसीसीचे महाव्यवस्थापक ज्योफ अॅलार्डिस यांनी अलीकडेच पीसीबी अधिकाऱ्यांची भेट घेतली होती. ज्यामध्ये पाकिस्तान एकदिवसीय विश्वचषक स्पर्धेतील त्यांच्या सामन्यांसाठी तटस्थ ठिकाणे शोधणार नाहीत, असे आश्वासन घेतले होते. बीसीसीआयचे सचिव जय शाह यांच्या नेतृत्वाखालील एसीसीने ‘हायब्रीड मॉडेल’वर आशिया कप सामने आयोजित करण्याची पाकिस्तानची मागणी फेटाळली आहे.
पाकिस्तानला अहमदाबादमध्ये फक्त बाद फेरी किंवा अंतिम सामना खेळायचाय –
पीसीबीच्या सूत्रांनी दिलेल्या माहितीनुसार, “नजम सेठी यांनी बार्कले आणि अल्लार्डाईसला कळवले आहे की, पाकिस्तानला नॉकआउट किंवा अंतिम प्रकारचा सामना असल्याशिवाय अहमदाबादमध्ये सामना खेळायचा नाही. त्यांनी आयसीसीला विनंती केली आहे की, जर पाकिस्तान सरकारने त्यांना भारत वर्ल्ड कप खेळण्याची परवानगी दिली, तर पाकिस्तानचे सामने चेन्नई, बंगळुरू आणि कोलकाता येथे आयोजित केले जावेत.”
अहमदाबादमध्ये संघाच्या सुरक्षेबाबत पीसीबी चिंतेत –
अहमदाबादमध्ये संघाच्या सुरक्षेबाबत पाकिस्तान बोर्ड चिंतेत आहे. मात्र, २००५ मध्ये इंझमाम-उल-हकच्या नेतृत्वाखाली पाकिस्तानी संघ मोटेरा येथे सामना खेळला होता. आयसीसीच्या महसुलातील पाकिस्तानचा वाटा पुढील पाच वर्षांच्या चक्रासाठी न वाढल्यास नवीन महसूल मॉडेल स्वीकारणार नाही, असेही सेठी यांनी स्पष्ट केले आहे.