सुरक्षेचा आढावा घेण्यासाठी पाकिस्तानचे पथक लवकरच भारतात; एकदिवसीय विश्वचषकाच्या केंद्रांची चाचपणी

ईदच्या सुट्टीनंतर पाकिस्तान क्रिकेट मंडळाच्या (पीसीबी) नवीन अध्यक्षांची निवड करण्यात येणार आहे. त्यानंतर एकदिवसीय विश्वचषकाचे सामने ज्या स्टेडियममध्ये होणार आहेत, तेथील सुरक्षेचा आढावा घेण्यासाठी पथक पाठवण्यात येईल. मात्र, हे पथक कधी पाठवायचे याचा निर्णय सरकारसह परराष्ट्र आणि गृहमंत्रालय घेईल, असे आंतर-प्रांतीय समन्वय (क्रीडा) मंत्रालयातील एका सूत्राने सांगितले.

‘‘एकदिवसीय विश्वचषकातील पाकिस्तानचे सामने ज्या केंद्रांवर होणार आहे, तेथील सुरक्षा आणि व्यवस्थेचा आढावा घेण्यासाठी ‘पीसीबी’चे पथक भारतात जाईल,’’ असे या सूत्राकडून सांगण्यात आले. हे पथक अहमदाबाद, चेन्नई, बंगळूरु, हैदराबाद आणि कोलकाता येथील केंद्रांची चाचपणी करेल. भारत आणि पाकिस्तान या पारंपरिक प्रतिस्पर्ध्यामधील सामना १५ ऑक्टोबरला अहमदाबाद येथील १ लाख ३२ हजार आसनसंख्या असलेल्या नरेंद्र मोदी स्टेडियमवर खेळवला जाणार आहे.

‘‘भारतामध्ये आपला संघ पाठवण्यापूर्वी क्रिकेट मंडळाला सरकारकडून परवानगी घ्यावी लागते. मग सरकारकडून सुरक्षेचा आढावा घेण्यासाठी भारतामध्ये पथक पाठवले जाते. ही नेहमीचीच प्रक्रिया आहे. हे पथक तेथील पदाधिकाऱ्यांशी चर्चा करेल. तसेच त्यांच्यासह सामने ज्या ठिकाणी होणार आहेत, तेथे जाऊन सुरक्षा आणि अन्य व्यवस्थेची चाचपणी करेल,’’ असेही या सूत्राने सांगितले.

या पथकाला ज्या केंद्रांवर सामने होणार आहेत, तेथील सुरक्षेबाबत पूर्ण खात्री नसल्यास तसे ते आपल्या अहवालात नमूद करतील.