जडेजाच्या पत्नीला मारहाण करणाऱ्या कॉन्स्टेबलला अटक

शारु रोडवर रिवाच्या बीएमडब्ल्यू कारने कॉन्स्टेबलच्या दुचाकीला धडक दिली. त्यानंतर तो पोलीस कॉन्स्टेबल त्याच्या मोटारसायलकवरुन उतरला व त्याने थेट जडेजाच्या पत्नीला मारहाण सुरु केली. कारने दुचाकीला धडक दिल्यानंतर रिवा गाडीतून उतरली. त्यावेळी संजयने स्त्रीदाक्षिण्य न दाखवता तिच्यावर हात उचलला.

या मारहाणीत रिवा जखमी झाली होती, अशी माहिती पोलीस अधिक्षक प्रदीप सीजुल यांनी सांगितले. या प्रकरणी तक्रार दाखल करण्यात आली होती. महिलेला मारहाण करणे हा गंभीर गुन्हा आहे. संजय अहिरची खातेनिहाय चौकशी होऊन त्याला निलंबित केले जाऊ शकते, अशी शक्यता आहे.

अपघात घडला तेव्हा रिवा सोबत जडेजाची आई आणि मुलगी होती. रवींद्र जडेजा सध्या आयपीएलमध्ये चेन्नई सुपर किंग्जकडून खेळत आहे. आज अंतिम फेरीत स्थान मिळवण्यासाठी चेन्नई आणि हैदराबादमध्ये प्ले-ऑफची महत्वाची लढत होत आहे.