पृथ्वी शॉमागे दुखापतीचं ग्रहण, न्यूझीलंड दौऱ्याबद्दल साशंकता

मुंबईचा संघ क्षेत्ररक्षण करत असताना, पृथ्वी शॉ मुंबईच्या खेळाडूने केलेला ओव्हरथ्रो वाचवण्यासाठी प्रयत्न करत होता. यादरम्यान त्याच्या खांद्याला दुखापत झाली. यानंतर पृथ्वीला थेट मैदानाबाहेर नेण्यात आलं. १० जानेवारी रोजी भारत अ संघ न्यूझीलंड दौऱ्यावर रवाना होणार आहे. त्यामुळे आपला फिटनेस सिद्ध करण्यासाठी पृथ्वी शॉ जवळ अवघे काही दिवस शिल्लक आहेत. दरम्यानच्या काळात पृथ्वी दुखापतीमधून सावरला नाही, तर त्याला न्यूझीलंड दौऱ्याला मुकावं लागण्याची शक्यता आहे.

दरम्यान रणजी स्पर्धेत पृथ्वीला आपली छाप पाडता आलेली नाहीये. भारतीय संघाच्या न्यूझीलंड दौऱ्यासाठी पृथ्वीचा पर्यायी सलामीवीर म्हणून विचार करण्यात येणार असल्याची बातमी समोर आली होती. त्यामुळे आगामी दिवसांमध्ये पृथ्वीच्या दुखापतीबद्दल काय नवीन माहिती मिळते हे पाहणं महत्वाचं ठरणार आहे.