जयपूर पिंक पँथर्सची घोडदौड

यू मुंबा संघाला रोखत गुणतालिकेत आघाडी घेणाऱ्या जयपूर पिंक पँथर्स संघाने प्रो-कबड्डी लीगमध्ये घरच्या मैदानावर विजयी घोडदौड कायम राखली. गुणतालिकेत पिछाडीवर पडलेल्या तेलुगू टायटन्स संघाने अटीतटीच्या लढतीत पाटणा पायरेट्सवर ३२-२९ असा विजय मिळवत उपांत्य फेरीच्या आशा जिवंत ठेवल्या.
जयपूरने गुणतालिकेत तळाशी असणाऱ्या पुणेरी पलटणला ३३-२७ असे नमवत वर्चस्व गाजवले. जयपूरतर्फे जसवीर सिंग आणि मनिंदर सिंग यांनी चढायांचे प्रत्येकी ७ गुण पटकावले.
प्रो कबड्डीच्या उपांत्य फेरीत स्थान मिळवण्यासाठी चुरस तीव्र होऊ लागली आहे. तेलुगू टायटन्सला आगेकूच करण्यासाठी पाटण्याविरुद्धच्या लढतीत विजय क्रमप्राप्त होता. मध्यंतराला टायटन्सचा संघ १६-१८ असा पिछाडीवर होता, मात्र विश्रांतीनंतर लगेचच या पिछाडीचे २४-२० अशा आघाडीत रुपांतर केले. ही आघाडी सातत्याने वाढवत त्यांनी सरशी साधली. टायटन्सतर्फे राहुल चौधरी आणि सुकेश हेगडे यांनी प्रत्येकी ८ गुणांची कमाई करत संघाच्या विजयात महत्त्वाची भूमिका बजावली.