Pro Kabaddi Season 6 : दबंग दिल्लीचा अष्टपैलू खेळ, जयपूर पिंक पँथर्स पराभूत

दिल्लीच्या नवीन कुमार, मिराज शेख आणि चंद्रन रणजीत या त्रिकुटाने जयपूरच्या बचावाची अक्षरशः खिल्ली उडवली. काही मोजके क्षण वगळता जयपूरचा एकही बचावपटू या त्रिकुटाला सामन्यात रोखू शकला नाही. दोन्ही कोपऱ्यांमधून दिल्लीच्या चढाईपटूंनी सुरेख बोनस पॉईंटची कमाई केली. नवीन कुमारने सामन्यात 10 गुण मिळवले तर मिराज आणि चंद्रन यांनी अनुक्रमे 9 व 8 गुणांची कमाई केली. दिल्लीच्या बचावपटूंनीही आज आपली छाप पाडली. कर्णधार जोगिंदर नरवालने बचावात 5 गुण मिळवत जयपूरचं सामन्यातलं उरलं-सुरलं आव्हानही मोडून काढलं.

दुसरीकडे जयपूरकडून चढाईमध्ये दिपक निवास हुडा आणि अनुप कुमार यांनी चांगली झुंद देण्याचा प्रयत्न केला. मात्र अन्य सर्व खेळाडूंनी आजच्या सामन्यात निराशा केली. दिपकने चढाईत 15 तर अनुपने 6 गुण मिळवले. मात्र मोहीत छिल्लर, बाजीराव होडगे यांसारख्या बचावपटूंनाही आज निराशाचे सामना करावा लागला. या पराभवानंतर जयपूरचा संघ अ गटात तळातल्या स्थानावर फेकला गेला आहे.