Pro Kabaddi Season 6 : यू मुम्बाची जयपूर पिंक पँथर्सवर मात; कोल्हापूरचा सिद्धार्थ देसाई चमकला

पहिल्या सत्रात जयपूर पिंक पँथर्सच्या खेळाडूंनी आक्रमक खेळ करत मुम्बाला पहिल्या काही मिनीटांमध्येच बाद केलं. जयपूरकडून चढाईत नितीन रावलने झटपट गुणांची कमाई करत मुम्बाच्या बचावफळीला खिंडार पाडलं. मात्र यानंतर यू मुम्बाने बचावपटूंच्या जोरावर सामन्यात जोरदार पुनरागमन केलं. फजल अत्राचली, सुरेंदर सिंह यांनी काही सुरेख पकडी करत मुम्बाचं आव्हान सामन्यात कायम राखलं. यामुळे मध्यांतराला जयपूरचा संघ केवळ १५-१३ अशी २ गुणांची आघाडी घेऊ शकला.

मात्र दुसऱ्या सत्रात यू मुम्बाने सामन्याचं चित्र पुरतं पालटवून ठेवलं. सिद्धार्थ देसाईने मॅरेथॉन चढाया करत जयपूरच्या बचावफळीला खिंडार पाडलं. दुसऱ्या सत्रात जयपूरच्या संघाला दोन वेळा बाद करुन यू मुम्बाने सामन्यात मोठी आघाडी घेतली. दुसऱ्या सत्रात रोहित बालियानने सिद्धार्थ देसाईला दमदार साथ देत काही महत्वाचे गुण कमावले. यामुळे बॅकफूटवर गेलेला जयपूरचा संघ सामन्यात परतू शकला नाही. अखेर यू मुम्बाने सामन्यात ३९-३२ ने बाजी मारली.