घरच्या मैदानावर खेळणाऱ्या दबंग दिल्लीने यू मुम्बावर सहज मात करत, घरच्या मैदानावर सलग तिसऱ्या विजयाची नोंद केली. ४०-२४ च्या फरकाने सामन्यात बाजी मारत दबंग दिल्लीने गुणतालिकेत आपलं पहिलं स्थान कायम राखलं आहे. यू मुम्बाच्या चढाईपटूंनी केलेली निराशा त्यांच्या पराभवाला कारणीभूत ठरली.
पहिल्या सत्रात यू मुम्बाने आक्रमक सुरुवात करत सामन्यात आघाडी घेतली होती. अर्जुन देशवाल, अभिषेक सिंह यांनी काही चांगले गुण कमावले, मात्र यानंतर दिल्लीने लगेचच सामन्यात पुनरागमन केलं. आपला आघाडीचा चढाईपटू नवीन कुमारच्या साथीने दिल्लीने यू मुम्बाच्या बचावफळीला खिंडार पाडलं. त्याला चंद्रन रणजित आणि अन्य खेळाडूंनी चांगली साथ दिली. मात्र दुसऱ्या बाजूने यू मुम्बानेही दिल्लीला सामन्यात मोठी आघाडी घेऊ दिली नाही. यामुळेच मध्यांतरापर्यंत दबंग दिल्लीचा संघ १४-११ ने आघाडीवर होता.
दुसऱ्या सत्रात दिल्लीच्या खेळाडूंनी सामन्याची सर्व सुत्र आपल्या हाती घेतली. यू मुम्बाच्या बचावपटूंना रणनिती आखत दिल्लीने आपल्या जाळ्यात ओढलं. अनुभवी जोगिंदर नरवाल, रविंदर पेहल यांच्या जाळ्यात मुम्बाचे चढाईपटू सहज अडकत गेले. दुसऱ्या बाजूने नवीन आणि चंद्रन रणजीतने चढाया करत यू मुम्बावर दुहेरी दबाव आणला. या दबावापुढे यू मुम्बाचा संघ सावरुच शकला नाही. अखेरीस ४०-२४ च्या फरकाने सामन्यात बाजी मारत, दिल्लीने आपलं अव्वल स्थान कायम राखलं आहे. यू मुम्बा गुणतालिकेत सहाव्या स्थानावर आहे.
