पीटीआय, नवी दिल्ली : भारतीय कुस्ती महासंघाचे अध्यक्ष ब्रिजभूषण शरण सिंह यांच्याविरुद्धचे आपले आंदोलन आता जागतिक पातळीवर नेण्याचे प्रयत्न भारतीय कुस्तीगिरांनी सुरू केले असून, यासाठी त्यांनी अन्य देशांतील ऑलिम्पिकपटूंना पाठिंबा देण्याचे आवाहन केले आहे. ‘‘आम्ही हे आंदोलन आता जागतिक पातळीवर नेणार आहे. आम्ही पाठिंबा मिळवण्यासाठी आता अन्य देशांतील ऑलिम्पिकपटू आणि ऑलिम्पिक पदकविजेत्यांना आवाहन करणार आहोत,’’ असे विनेश फोगटने सांगितले. कुस्तीगिरांच्या आंदोलनाचा सोमवारी २३वा दिवस होता. ‘‘आमच्या आंदोलनात व्यत्यय आणण्याचा प्रयत्न केला जात आहे. येथे काही लोकांना रेकॉर्डिग करायला, आमची छायाचित्रे काढायला पाठवले जात आहे. त्यांना थांबायला सांगितल्यास ते पळून जातात. काही अनोळखी महिलांनी आमच्या तंबूत झोपण्याचाही प्रयत्न केला. आम्हाला अनोळखी असलेल्या महिलांना पाठवून आमचे आंदोलन उधळून लावण्याचा प्रयत्न होत आहे. आम्हाला त्रास दिला जात आहे. सत्य आणि न्यायासाठी सुरू असलेल्या आमच्या लढय़ाला कलंकित करण्याचा प्रयत्न सुरू आहे,’’ असेही विनेशने सांगितले. ‘‘आम्हाला आता जंतरमंतरवर एका कोपऱ्यात ढकलले जात आहे असे वाटू लागले आहे. मात्र, आम्ही डगमगणार नाही. आम्ही आता जागतिक पातळीवर हा लढा घेऊन जाणार आहोत,’’ असे विनेश म्हणाली. कुस्ती महासंघाच्या अध्यक्षांवर कारवाई करण्यासाठी आम्ही २१ मेपर्यंतची मुदत दिली आहे. तोपर्यंत निर्णय न झाल्यास आम्ही आंदोलन अधिक व्यापक करू. - विनेश फोगट
