बीसीसीआयच्या बंगळुरु येथील राष्ट्रीय क्रिकेट अकादमीचा प्रमुख आणि माजी क्रिकेटपटू राहुल द्रविडला, BCCI च्या लोकपालांनी नोटीस बजावली आहे. मध्य प्रदेश क्रिकेट असोसिएशनचे सदस्य संजीव गुप्ता यांनी बीसीसीआयकडे तक्रार केली होती, या तक्रारीत द्रविडवर हितसंबंध जपल्याचा आरोप ठेवण्यात आला आहे. यावरुन बीसीसीआयचे लोकपाल, निवृत्त न्यायाधीश डी.के.जैन यांनी द्रविडला नोटीस बजावली आहे.
राहुल द्रविड राष्ट्रीय क्रिकेट अकादमीच्या अध्यक्षपदासोबत, इंडियन सिमेंट उद्योग समुहात उपाध्यक्ष पदावर काम करतोय. इंडियन सिमेंट उद्योग समुहाचा चेन्नई सुपरकिंग्ज हा संघ आयपीएलमध्येही खेळतो. याच मुद्द्यावरुन संजीव गुप्ता यांनी बीसीसीआयच्या लोकपालांकडे तक्रार केली आहे. “दाखल झालेल्या तक्रारीवरुन द्रविडला नोटीस पाठवण्यात आली असून त्याला उत्तर देण्यासाठी २ आठवड्यांचा कालावधी देण्यात आला आहे. द्रविडने आपलं उत्तर पाठवल्यानंतर पुढची पावलं उचलली जातील.” डी.के.जैन यांनी वृत्तसंस्थेशी बोलताना माहिती दिली.
१६ ऑगस्टपर्यंत राहुल द्रविडने जैन यांना आपलं उत्तर कळवणं अपेक्षित आहे. असं न केल्यास राहुलला जैन यांच्यासमोर सुनावणीसाठी हजर रहावं लागू शकतं. मात्र बीसीसीआयच्या या नोटीशीवरुन भारताचा माजी कर्णधार सौरभ गांगुली चांगलाच भडकला आहे, आता देवच भारतीय क्रिकेटचा वाचवू शकतो अशा आशयाचं ट्विट करत गांगुलीने आपला राग व्यक्त केला आहे.
New fashion in indian cricket …..conflict of interest ….Best way to remain in news …god help indian cricket ……Dravid Gets Conflict of Interest Notice from BCCI Ethics Officer https://t.co/3cD6hc6vsv.
— Sourav Ganguly (@SGanguly99) August 6, 2019
यावर फिरकीपटू हरभजन सिंहनेही, द्रविड सारख्या सज्जन माणसाला नोटीस पाठवणं म्हणजे त्याचा अपमान करण्यासारखं आहे असं म्हणत गांगुलीच्या मताशी आपण सहमत असल्याचं म्हटलंय.
Really ?? Don’t know where it’s heading to.. u can’t get better person thn him for indian cricket. Sending notice to these legends is like insulting them.. cricket need their services for betterment.. yes god save indian cricket https://t.co/lioRClBl4l
— Harbhajan Turbanator (@harbhajan_singh) August 6, 2019
त्यामुळे राहुल द्रविड या नोटीशीला काय उत्तर देतो हे पाहणं महत्वाचं ठरणार आहे.