Rahul Dravid on Suryakumar Yadav: टीम इंडिया बुधवारी ऑस्ट्रेलियाविरुद्ध शेवटची वनडे खेळणार आहे. चेन्नईत होणाऱ्या या सामन्याआधी दोन सामन्यांमध्ये फ्लॉप ठरलेला स्टार फलंदाज सूर्यकुमार यादव तिसऱ्या वनडेत स्थान मिळवणार का? याकडे सर्वांच्या नजरा लागल्या आहेत. टीम इंडियाचे प्रशिक्षक राहुल द्रविड यांनी सूर्यकुमार यादवच्या फॉर्मबाबत मोठे वक्तव्य केले आहे. तिसऱ्या सामन्यापूर्वी द्रविडने सूर्याच्या अलीकडच्या फॉर्मबद्दलची चिंता दूर केली. ते म्हणाले की सूर्यकुमार अजूनही ५० षटकांच्या क्रिकेटच्या वेगाशी जुळवून घेत आहे. तो अनुभवाने शिकत जाईल.
सूर्यकुमारची फारशी चिंता नाही –
राहुल द्रविड म्हणाले, ”मला सूर्यकुमारची फारशी चिंता नाही. दोन चांगल्या चेंडूंवर त्याने आपली विकेट गमावली. सूर्याबद्दल एक गोष्ट म्हणजे तो ५० षटकांच्या खेळाबद्दल थोडे शिकत आहे. टी-२० सामना थोडा वेगळा आहे.” द्रविड पुढे म्हणाले, “जरी तो बराच काळ भारतासाठी खेळला नसला, तरी तो टी-२० क्रिकेटमध्ये जवळपास १० वर्षे आयपीएल खेळला. हे आंतरराष्ट्रीय क्रिकेटसारखे आहे. तो भरपूर क्रिकेट खेळला आहे.”
हेही वाचा – IPL 2023: पंजाब संघाला मोठा धक्का; ‘हा’ स्फोटक इंग्लिश फलंदाज आयपीएलमधून बाहेर होण्याची शक्यता
थोडा वेळ देण्याची आणि धीर धरण्याची गरज –
मुख्य प्रशिक्षक म्हणाले, “त्यानी हाय-प्रेशरचे टी-२० सामने खेळलेत. पण एकदिवसीय क्रिकेटमध्ये देशांतर्गत क्रिकेटमध्ये तुल्यबळ स्पर्धा नाही. तुम्हाला विजय हजारे ट्रॉफी आणि ते सर्व खेळावे लागेल. जरी त्याने भरपूर टी-२० क्रिकेट खेळले असले, तरी मला वाटते की तो फारसा एकदिवसीय क्रिकेट खेळला नाही. आपल्याला फक्त थोडा वेळ देण्याची आणि धीर धरण्याची गरज आहे. त्याच्याकडून आम्हाला नक्कीच चांगली कामगिरी पाहायला मिळेल, जी संघासाठी चांगली आहे.”
संघ आणि खेळाडूंबद्दल खूप स्पष्ट आहोत –
दुसरीकडे राहुल द्रविड यांचा असा विश्वास आहे की, एकदिवसीय विश्वचषकाबाबत संघ अतिशय स्पष्ट आहे. ते म्हणाले, “मला वाटते की आम्ही संघ आणि खेळाडूंबद्दल खूप स्पष्ट आहोत. आम्ही ते १७-१८ खेळाडूंपर्यंत कमी केले आहे. आमच्याकडे काही खेळाडू आहेत, जे दुखापतींमधून बरे होत आहेत आणि ते मिश्रणात येऊ शकतात. त्यांच्या पुनर्प्राप्तीच्या कालावधीनुसार त्यांना येण्यासाठी किती वेळ लागतो, हे पाहिले जाईल. एकूणच आम्ही खूप चांगल्या स्थितीत आहोत. आम्हाला कोणत्या प्रकारचा संघ खेळवायचा आहे, याबाबत आम्ही स्पष्ट आहोत.”
वेगवेगळे कॉम्बिनेशन करून बघेन –
ऑक्‍टोबर-नोव्‍हेंबरमध्‍ये होणार्‍या विश्‍वचषकातही संघ व्‍यवस्‍थापनाने वेगवेगळे कॉम्बिनेशन वापरण्‍याची सूचना द्रविडने केली. बुधवारी चेन्नईत फिरकीसाठी अनुकूल खेळ होण्याची शक्यता आहे. भारताकडे कुलदीप यादव, रवींद्र जडेजा, अक्षर पटेल, युझवेंद्र चहल आणि वॉशिंग्टन सुंदर आहेत. द्रविड म्हणाले, “आमच्या १५ किंवा १६ खेळाडूंमध्ये आमच्याकडे काही भिन्न कॉम्बिनेशन्स आहेत, जे आम्हाला वापरून पाहायचे आहेत आणि कोणते कार्य करते. कारण विश्वचषक ही मोठी स्पर्धा आहे.”