रणजी क्रिकेट : सिद्धेश लाड, श्रेयस अय्यरची शतकं; पहिल्या दिवशी मुंबई वरचढ

नाणेफेक जिंकून बडोद्याने पहिल्यांदा गोलंदाजी करण्याचा निर्णय घेतला. आदित्य तरे आणि विक्रांत औटी हे फलंदाज लवकर माघारी परतले. मात्र यानंतर मैदानात आलेल्या सिद्धेश लाड आणि श्रेयस अय्यरने संघाचा डाव सावरला. दोन्ही फलंदाजांनी बडोद्याच्या गोलंदाजाचा समाचार घेत शतकी खेळी केली. श्रेयस अय्यरने 17 चौकार आणि 11 षटकारांच्या सहाय्याने 178 धावा पटकावल्या. कर्णधार सिद्धेश लाडनेही 130 धावा करत त्याला उत्तम साथ दिली. श्रेयस अय्यर माघारी परतल्यानंतर मधल्या फळीत शुभम रांजणे आणि शिवम दुबे यांनीही छोटेखानी खेळ करत मुंबईला 400 धावांचा टप्पा गाठून दिला.

बडोद्याकडून रणजी क्रिकेटमध्ये पुनरागमन करणाऱ्या हार्दिक पांड्याने मुंबईच्या 3 फलंदाजांना माघारी धाडलं. फिरकीपटू भार्गव भटने 4 बळी घेतले. पहिल्या दिवशी मुंबईने आपली बाजू मजबूत केली असल्यामुळे मुंबईचे उर्वरित दोन फलंदाज उद्याच्या खेळात किती धावांची भर घालू शकतात याकडे सर्वांचं लक्ष असणार आहे.