Ranji Trophy 2025 Virat Kohli won everyone’s hearts : विराट कोहली २०१२ नंतर प्रथमच रणजी ट्रॉफीमध्ये खेळत आहे. दिल्लीचा सामना त्याच्या होम ग्राउंड अरुण जेटली स्टेडियमवर रेल्वेशी होत आहे. बीसीसीआयने राष्ट्रीय संघात निवडीसाठी रणजी ट्रॉफी खेळणे अनिवार्य केले आहे. त्यानंतर अनेक मोठे खेळाडू त्यांच्या राज्य संघांसाठी उपलब्ध झाले आहेत. दरम्यान, विराट कोहलीने आपल्या साधेपणाने सर्वांची मनं जिंकली आहेत. दिल्ली संघाचे व्यवस्थापक महेश भाटी यांनी सांगितले की त्यांनी कोहलीला मदत करण्याची ऑफर दिली, परंतु कोहलीने नम्रपणे नकार दिला.
विराट कोहली स्टेडियममध्ये आला, तेव्हा दिल्ली सघाचे व्यवस्थापक महेश भाटी यांनी त्याला किट उचलण्यासाठी मदत करण्याची ऑफर दिली, परंतु त्याने साफ नकार दिला. महेश भाटी यांनी टाईम्स ऑफ इंडियाला सांगितले की, कोहली ड्रेसिंग रूममध्ये आला तेव्हा मी म्हणालो, “विराट, मला तुझी मदत करू दे.’ यावर कोहलीने उत्तर दिले, ‘भैया, तुम्ही काय बोलताय? हे माझे खेळण्याचे साहित्य आहे, ते मी स्वतः घेऊन जाईन. यानंतर त्याने किट बॅग उचलून खांद्यावर घेतली आणि ड्रेसिंग रूमच्या आत गेला.”
अंडर-१९ मध्ये भाटी हे विराटचे प्रशिक्षक होते –
महेश भाटी अंडर-१९ क्रिकेटमध्ये विराट कोहलीचे प्रशिक्षक होते. विराटने त्याला मॅटिंगबाबतही विचारले. भाटी म्हणाले. “विराट जेव्हा अंडर-१९ साठी खेळायचा तेव्हा मी प्रशिक्षक होतो. तो माझ्या प्रशिक्षणाखाली खेळला आहे. त्यामुळे सुरुवातीपासूनच आमच्यात खूप छान बॉन्डिंग आहे. मलाही विनोद सांगायला आवडतात आणि त्यालाही. तर, आम्ही जुन्या आठवणी ताजा करत होतो आणि छान हसत होतो. सगळ्यात आधी त्याने विचारलं, ‘भैया, आता मुलं मॅटिंगवर खेळत नाहीत का?’ मी म्हणालो, ‘तू वेडा झाला आहेस ?’ आता मॅटिंग कुठे आहे? आता दिल्लीत कुठेही मॅटिंग मिळणार नाही.”
विराटने शेवटचा रणजी सामना कोणाविरुद्ध खेळला होता –
विराट कोहलीने शेवटचा रणजी सामना वीरेंद्र सेहवागच्या नेतृत्वाखालील दिल्ली संघासाठी नोव्हेंबर २०१२ मध्ये गाझियाबादमध्ये सुरेश रैनाच्या नेतृत्वाखालील उत्तर प्रदेश संघाविरुद्ध खेळला होता. उत्तर प्रदेशने नाणेफेक जिंकून प्रथम क्षेत्ररक्षण करण्याचा निर्णय घेतला आणि विराट कोहलीने पहिल्या डावात १४ धावा आणि दुसऱ्या डावात ४३ धावा केल्या होत्या. त्याला दोन्ही डावात भुवनेश्वर कुमारने बाद केले होते.
