मुंबईच्या कुचकामी फलंदाजीचे पितळ पुन्हा एकदा साऱ्यांसमोर उघडे पडले. रेल्वेने बुधवारी त्यांचा पहिल्या डावात अवघ्या १०१ धावांमध्ये खुर्दा उडवला. रेल्वेच्या २४२ धावांचा पाठलाग करताना सामन्याच्या अखेरच्या दिवशी मुंबईचा पहिला डाव शतकाची वेस ओलांडल्यावर लगेचच आटोपला. त्यामुळे रेल्वला पहिल्या डावातील आघाडीच्या जोरावर तीन गुण मिळाले, तर मुंबईला एका गुणावर समाधान मानावे लागले.
मुंबईची ९ बाद ७० अशी अवस्था असताना त्यांना फॉलोऑन टाळण्यासाठी ९२ धावांची गरज होती. त्या वेळी बोटाला दुखापत झालेला जावेद खान फलंदाजीला उतरला आणि त्याने ६ चौकारांच्या जोरावर नाबाद २७ धावांची खेळी साकारल्यामुळे मुंबईला फॉलोऑनची नामुष्की टाळता आली. जावेदच्या सर्वोत्तम धावसंख्येसहित चार फलंदाजांना दोनअंकी धावसंख्या करता आल्या. रेल्वेकडून अनुरीत सिंगने सर्वाधिक चार बळी मिळवले. मुंबईने ४ बाद ५२ वरून पुढील १८ धावांमध्ये पाच फलंदाज गमावले. रेल्वेने दुसऱ्या डावात चौथ्या दिवसअखेपर्यंत ४ बाद १३६ अशी मजल मारली.
महाराष्ट्राला पराभवाचा धक्का
रोहटक : ‘नाव मोठे, लक्षण खोटे’ ही म्हण महाराष्ट्राच्या फलंदाजांसाठी तंतोतंत खरी ठरली. विजयासाठी २०८ धावांच्या माफक आव्हानाला सामोरे जाताना त्यांनी सपशेल नांगी टाकली. हरयाणाच्या मोहित शर्माने पाच बळी घेत आपल्या संघाला रणजी क्रिकेट सामन्यात बुधवारी ५३ धावांनी सनसनाटी विजय मिळवून दिला. ३९.२ षटकांत महाराष्ट्राचा डाव १५४ धावांवर कोसळला. हरयाणाकडून मोहित शर्माने ४५ धावांमध्ये पाच बळी घेतले.
