मुंबई-बंगाल आमनेसामने

रणजी हंगामात सलामीच्या लढतीत नवख्या जम्मू आणि काश्मीरकडून चीतपट झाल्यानंतर खडबडून जागे झालेल्या मुंबईने उत्तर प्रदेशविरुद्ध दणदणीत विजय मिळवला. मात्र तब्बल ४० रणजी जेतेपदे नावावर असणाऱ्या मुंबईचा आता आपल्या दर्जाला साजेशी कामगिरी करू न शकणाऱ्या बंगालशी सामना होणार आहे. उत्तर प्रदेशविरुद्ध विजय मिळवल्यानंतरही निवड समितीने संघात घाऊक बदल करत सर्वच खेळाडूंना इशारा दिला आहे. कानपूरला कडाक्याच्या थंडीनंतर मुंबईचा संघ आता उष्ण, दमट हवामानाच्या कोलकात्यात दाखल झाला आहे. तीन सामन्यांनंतर ७ गुणांसह मुंबई चौथ्या स्थानी आहे.