‘या’ कारणामुळे ऐतिहासिक ऑस्ट्रेलिया दौऱ्यात अक्षरश: जमिनीवर लोळला होता आर अश्विन

रविचंद्रन अश्विन आणि हनुमा विहारी हे ऑस्ट्रेलियाविरुद्धच्या तिसऱ्या कसोटीत भारतासाठी ‘सुपरहीरो’ ठरले होते. सिडनी क्रिकेट ग्राउंडवरील सामना अनिर्णित ठेवण्याची ऐतिहासिक कामगिरी भारताने केली होती. या जोडीने २५९ चेंडूंचा सामना करत नाबाद ६२ धावांची भागीदारी केली होती. विहारीच्या अंगठ्याला दुखापत झाली होती तर अश्विन देखील पाठदुखीच्या समस्येने त्रस्त होता. असे असूनही दोघांनी मैदान सोडले नव्हते.

रविचंद्रन अश्विनने एएनआयला सांगितले, “फलंदाजीमध्ये महत्त्वाची भागीदार भागीदारीमागे विहारी आणि माझ्यामध्ये असलेला चांगला संवाद फायद्याचा ठरला. आम्ही जेव्हा एकमेकांशी चर्चा केली तेव्हा आम्हाला काय समस्या आहे हे समजले. स्नायू ताणले गेल्यामुळे तो पुढे येऊन बॅकफूटवर जाऊ शकत नव्हता. तर, माझ्याही पाठीमध्ये वेदना होत्या. पण, आम्ही त्यातून मार्ग काढण्याचा निर्णय घेतला. काहीवेळा विहारीने वेगवान गोलंदाजांचा सामना केला आणि मी फिरकीपटूंचा सामना केला. अशा पद्धतीने आम्ही दोन षटके फलंदाजी केली.”

सिडनीमध्ये झालेल्या पाठीच्या दुखापतीमुळे अश्विनला गाबा येथे झालेल्या कसोटीला मुकावे लागले होते. त्याबद्दल अश्विनने सांगितले की, ‘सिडनी कसोटीनंतर त्याची अवस्था फारच वाईट झाली होती. असह्य वेदनांमुळे तो अक्षरश: जमीनीवर लोळत होता. उभे राहण्यासाठी सुद्धा त्याला त्याची पत्नी आणि मुलींचा आधार घ्यावा लागत होता.’

२०२०-२१मधील ऑस्ट्रेलियाविरुद्धची ही कसोटी मालिका भारतीय संघासाठी आणि संघातील प्रत्येक खेळाडूसाठी विशेष ठरली होती. पण, रविचंद्रन अश्विनसाठी ती जास्त विशेष ठरली. दुखापतग्रस्त असूनही त्याने अष्टपैलू कामगिरी करून संघाच्या कामगिरीमध्ये मोलाचे योगदान दिले होते.