Ravindra Jadeja vs West Indies ODI Highest wicket taker: भारत आणि वेस्ट इंडिज संघांत सध्या तीन सामन्यांची वनडे मालिका खेळली जात आहे. या मालिकेतील पहिला सामना गुरुवारी पार पडला. पहिल्या सामन्यात यजमान वेस्ट इंडिज संघाचा ५ विकेट्सने धुव्वा उडवला. या सामन्यात टीम इंडियाचा अष्टपैलू खेळाडू रवींद्र जडेजाने तीन विकेट्स घेत एका मोठ्या विक्रमाला गवसनी घातली. त्याने हा पराक्रम करताना कपिल देव आणि अनिल कुंबळे यांना मागे टाकले आहे.
या सामन्यात टीम इंडियाने प्रथम गोलंदाजी करण्याचा निर्णय घेतला. हा निर्णय योग्य ठरला आणि वेस्ट इंडिजचा संघ अवघ्या २३ षटकांत ११४ धावांत सर्वबाद झाला. टीम इंडियाच्या गोलंदाजांनी आपल्या शानदार कामगिरीच्या जोरावर अनेक मोठे विक्रम मोडीत काढले. त्यानंतर भारतीय संघाने प्रत्युत्तरात २२.५ षटकांत ५ विकेट्स गमावून ११८ धावा करत विजय नोंदवला.
रवींद्र जडेजाने रचला इतिहास –
वेस्ट इंडिजविरुद्धच्या पहिल्या एकदिवसीय सामन्यात रवींद्र जडेजाने इतिहास रचला आहे. जडेजा आता वेस्ट इंडिजविरुद्ध भारताकडून सर्वाधिक बळी घेणारा गोलंदाज बनला आहे. जडेजाच्या आता वेस्ट इंडिजविरुद्ध ४४ विकेट्स आहेत. त्याने माजी भारतीय कर्णधार कपिल देव (४३) यांना मागे टाकले आहे. त्याचवेळी जडेजाने याच सामन्यात ४१ बळी घेणाऱ्या अनिल कुंबळेलाही मागे टाकले.
हेही वाचा – Deodhar Trophy 2023: रियान परागने रचला इतिहास, तब्बल ‘इतके’ षटकार लगावत मोडला युसूफ पठाणचा विक्रम
शमी आणि हरभजनचेही नाव यादीत –
याशिवाय मोहम्मद शमीचे नावही या यादीत आहे. शमीने वेस्ट इंडिजविरुद्ध ३७ विकेट घेतल्या आहेत. या यादीत पाचवे नाव हरभजन सिंगचे आहे. हरभजनने वेस्ट इंडिजविरुद्ध एकूण ३३ विकेट घेतल्या आहेत. या यादीत जडेजा अव्वल असून आता या मालिकेत आणखी दोन सामने बाकी आहेत. अशा स्थितीत जड्डूला आपली आघाडी आणखी वाढवण्याची चांगली संधी आहे.
एकदिवसीय सामन्यात वेस्ट इंडिजविरुद्ध सर्वाधिक विकेट्स घेणारे भारतीय गोलंदाज –
४४- रवींद्र जडेजा<br>४३- कपिल देव
४१- अनिल कुंबळे
३७- मोहम्मद शमी<br>३३- हरभजन सिंग
हेही वाचा – Bhuvneshwar Kumar: टीम इंडियाच्या गोलंदाजाने घेतला मोठा निर्णय! इन्स्टाग्राम बायोमधून हटवला ‘तो’ शब्द
टीम इंडियाची शानदार गोलंदाजी –
वेस्ट इंडिजविरुद्धच्या पहिल्या वनडेत भारतीय गोलंदाजांनी चमकदार कामगिरी केली. भारताकडून कुलदीप यादवने सर्वाधिक ४ विकेट्स घेतल्या. त्याचबरोबर जडेजानेही ३ विकेट्स घेतल्या. याशिवाय शार्दुल ठाकूर, मुकेश कुमार आणि हार्दिक पांड्या यांनी १-१ विकेट घेतली.
