IND vs AUS : वादानंतर ऑस्ट्रेलियन कर्णधार झाला विराट कोहलीचा फॅन

पेन म्हणाला की, विराट कोहली प्रत्येकवेळा जिंकण्यासाठी खेळत असतो. ‘हेराल्ड सन’ या स्थानिक वृत्तपत्रात लिहलेल्या कॉलममध्ये पेनने विराट कोहलीची स्तुती केली आहे. तो म्हणाला का, पर्थ कसोटीमध्ये विराटसोबत झालेल्या वादाला विनाकारण महत्व दिले. गेल्या काही वर्षांपासून मी विराट कोहलीची फलंदाजी पाहतो आहे. विराट कोहलीची फलंदाजी पहायला मला आवडते. मैदानावर विराट कोहलीसोबत वाद घातल्याचा आनंद घेतोय. मी विराट कोहलीवर नाराज नाही. विजयासाठी विराट कोहली सर्वस्व झोकून देणारा खेळाडू आहे. विराट कोहलीला पराभव नकोसा असतो. तो नेहमी विजयासाठी खेळतो. अशी स्तुतीसुमने पेनने विराट कोहलीवर उधळली आहेत.

ऑस्ट्रेलिया आणि भारत यांच्यात मेलबर्न येथे होणाऱ्या तिसऱ्या कसोटी सामन्याला २६ डिसेंबरपासून सुरूवात होणार आहे. दोन्ही संघ चार सामन्यांच्या कसोटी मालिकेत १-१ असे बरोबरीत आहेत. पहिल्या दोन कसोटी सामन्यांचा विचार केला असता, कोहली-रहाणे-पुजाराचा अपवाद वगळता अन्य फलंदाज आपल्या लौकिकाला साजेसा खेळ करु शकले नाहीयेत. विराटने पर्थ कसोटीत शतकी खेळी केली, मात्र त्याला इतर फलंदाजांची योग्य साथ लाभली नाही. त्यातच मुंबईकर पृथ्वी शॉ दुखापतीमुळे संघाबाहेर पडल्यामुळे तिसऱ्या कसोटी सामन्यात संघ व्यवस्थापन कोणाला संधी देणार हा प्रश्न अजुनही अनुत्तरित आहे. पृथ्वीच्या जागी मयांक अग्रवालला संघात जागा देण्यात आली आहे. याचसोबत हार्दिक पांड्यानेही संघात पुनरागमन केलं आहे, त्यामुळे तिसऱ्या कसोटी सामन्यात भारतीय संघ कसा खेळ करतो याकडे सर्वांचं लक्ष असणार आहे.