Rinku Singh Hattrick of Sixes Video Viral in UPL 2023: भारतीय क्रिकेटचा उदयोन्मुख स्टार फलंदाज रिंकू सिंगची चमक कायम आहे. आयपीएलमध्ये सलग ५ षटकार ठोकून आपल्या संघाला विजय मिळवून देण्याचा पराक्रम करणाऱ्या रिंकू सिंगने पुन्हा एकदा आश्चर्यकारक कामगिरी केली आहे. वास्तविक, उत्तर प्रदेश प्रीमियर लीग (यूपीएल २०२३) च्या पहिल्या हंगामात मेरठकडून खेळणाऱ्या रिंकूने काल रात्री काशी रुद्रांश विरुद्धच्या सामन्यात षटकारांची हॅट्ट्रिक मारून आपल्या संघाला विजय मिळवून दिला.

सुपर ओव्हरमध्ये ठोकले ३ षटकार –

या सामन्यात टीम इंडियाचा नवीन फिनिशर रिंकू सिंगची अप्रतिम फिनिशिंग स्टाईल पाहायला मिळाली. त्याने अवघ्या ३ चेंडूत सलग ३ षटकार मारून सुपर ओव्हरमध्ये १७ धावांचे लक्ष्य गाठले. या सामन्यात प्रेक्षकांमध्येही प्रचंड उत्साह पाहायला मिळाला. सुपर ओव्हरमध्ये काशी रुद्रांशने मेरठ मार्विक्सला १७ धावांचे लक्ष्य दिले होते. मेरठकडून रिंकू आणि दिव्यांश फलंदाजीला आले होते, पण दिव्यांश दुसऱ्या टोकाला उभा राहिला आणि रिंकूने अवघ्या ३ चेंडूत सामना संपवला.

माधव कौशिकने ८७ धावांची शानदार खेळी साकारली –

या सामन्यात मेरठ मार्विक्सने प्रथम फलंदाजी करताना २० षटकांत ४ विकेट गमावून १८१ धावा केल्या होत्या. मेरठकडून माधव कौशिकने ५२ चेंडूत ९ चौकार आणि ४ षटकारांसह ८७ धावांची स्फोटक खेळी खेळली. या काळात रिंकूने २२ चेंडूत १५ धावा केल्या होत्या. १८१ धावांच्या लक्ष्याचा पाठलाग करताना काशी रुद्र संघाने २० षटकांत ७ गडी गमावून १८१ धावा केल्या आणि सामना सुपर ओव्हरमध्ये गेला.

हेही वाचा – Hotstar आणि Jio च्या स्पर्धेत प्रेक्षकांना झाला मोठा फायदा, Asia Cup पाठोपाठ विश्वचषकाचाही घेता येणार मोफत आनंद

असा रंगला सुपर ओव्हरचा थरार –

सुपर ओव्हरमध्ये काशीच्या संघाने एका षटकात १६ धावा केल्या आणि मेरठला १७ धावांचे लक्ष्य दिले. काशीकडून करण शर्माने 5 चेंडूत एका चौकार आणि एका षटकाराच्या मदतीने १० धावा केल्या. त्याचवेळी मोहम्मद शरीमने शेवटच्या चेंडूवर षटकार ठोकला. मेरठकडून रिंकू सिंग आणि दिव्यांश फलंदाजीला आले. रिंकू स्ट्राइकवर होता. त्याने षटकातील अवघ्या चार चेंडूत सामना संपवला. पहिला चेंडू त्याचा डॉट होता, मात्र त्यानंतर रिंकूने ३ चेंडूत ३ षटकार ठोकले. याआधी आयपीएलमध्ये केकेआरकडून खेळताना रिंकू सिंगने गुजरात टायटन्सविरुद्धच्या सामन्यात एका षटकात ५ षटकार मारून आपल्या संघाला विजय मिळवून दिला होता.