ऋषभ पंतची दिल्लीच्या कर्णधारपदावरुन उचलबांगडी, रणजी करंडकातली खराब कामगिरी भोवली

२०१७ सालात विजय हजारे करंडक स्पर्धेपासून ऋषभ पंतकडे दिल्लीचं नेतृत्व देण्यात आलं होतं. मात्र कर्णधारपदाची जबाबदारी अंगावर आल्यानंतर ऋषभच्या फलंदाजीचा फॉर्म घसरला होता. रणजी करंडक स्पर्धेत पंत अवघ्या ३१५ धावा काढू शकला.

“रणजी सामन्यादरम्यान ऋषभला कर्णधारपदाचा भार होत असल्याचं आम्हाला जाणवलं. कर्णधारपदाची जबाबदारी तो योग्य पद्धतीने हाताळत नव्हता. कदाचीत याच कारणामुळे यंदाच्या हंगामात तो धावा करु शकला नाही. त्यामुळे टी-२० स्पर्धेत त्याच्यावरचा हा भार कमी करणं आम्हाला योग्य वाटलं. टी-२० क्रिकेटमध्ये ऋषभ पंत आक्रमक फलंदाजी करतो. त्यामुळे प्रशिक्षक के. पी. भास्कर यांच्याशी चर्चा करुन आम्ही हा निर्णय घेतला असल्याचं”, दिल्ली क्रिकेट असोसिएशनच्या निवड समितीचे अध्यक्ष अतुल वासन यांनी सांगितलं.