IND vs NZ 3rd Test Day 2 Updates in Marathi: ऋषभ पंत आणि शुबमन गिलने मंबई कसोटीच्या दुसऱ्या दिवसाचा खेळ सुरू होताच आतिषबाजी करत एक जबरदस्त सुरूवात करून दिली. पहिल्या दिवसाचा खेळ संपेपर्यंत भारतीय संघ चांगलाच अडचणीत सापडला होता. दरम्यान भारताला जर सामन्यात टिकून राहायचे असेल तर दुसऱ्या दिवशी भारताला चांगली सुरूवात करणं अपेक्षित होतं. त्याचप्रकारे कामगिरी ऋषभ पंत आणि शुबमन गिलने केली. पंतने पहिल्या चेंडूपासून आक्रमक खेळी केली आणि चौकारांचा पाऊस पाडला.
ऋषभ पंतने अवघ्या ३६ चेंडूत विस्फोटक फलंदाजी करत आपले अर्धशतक पूर्ण केले. न्यूझीलंडचा फिरकीपटू एजाज पटेलची तर पंतने अशी काही कुटाई केली की त्याच्या १५ चेंडूत पंतने ३३ धावा केल्या. परिणामी किवी कर्णधाराला गोलंदाज बदलावा लागला. पण तोवर भारताने चांगली फलंदाजी केली होती. पंतने ६ चौकार आणि २ षटकारांसह आपले वेगवान अर्धशतक पूर्ण केले. तर पंतच्या आधी गिलने ६९ चेंडूत आपले सातवे कसोटी अर्धशतक पूर्ण केले.
हेही वाचा – IND vs PAK: पाकिस्तानने ५ षटकांत भारताचा केला पराभव, एकही विकेट न गमावता गाठले १२० धावांचे लक्ष्य
भारताने दुसऱ्या दिवशीच्या पहिल्या सत्रातील पहिल्या तासात १४ षटकांत ७७ धावा केल्या आहेत आणि महत्त्वाचे म्हणजे एकही विकेट भारताने गमावली नाही. भारताने पहिल्या दिवशीही चांगली सुरूवात केली पण दिवसाचा खेळ संपेपर्यंत भारताने ९ चेंडूत ३ विकेट गमावले आणि संघ चांगलाच अडचणीत सापडला. पण ऋषभ पंत आणि शुबमन गिलने दुसऱ्या दिवशी चांगली सुरूवात करत संघाचा डाव उचलून धरला.
न्यूझीलंड संघाकडे या कसोटीत स्पेशालिस्ट फिरकीपटू आहे तो म्हणजे एजाज पटेल. ग्लेन फिलीप्सदेखील एक चांगला गोलंदाज आहे. पण मिचेल सँटनरची अनुपस्थिती संघासाठी मोठा फटका बसला आहे. सँटनरच्या जागी ईश सोधीला संघाने संधी दिली. किवी खेळाडूंनी ऋषभ पंत आणि गिल दोघांच्याही कॅच ड्रॉप केल्या, ज्याचा त्यांना फटका बसला. ३६ षटकांत भारताने ४ बाद १७२ धावा केल्या आहेत. भारताला वर्ल्ड टेस्ट चॅम्पियनशिपच्या दृष्टीने हा सामना जिंकणं खूप महत्त्वाचं आहे.
