Rishabh Pant Surpasses MS Dhoni For Massive Feat in Test during IND vs NZ match : भारत आणि न्यूझीलंड यांच्यात तीन सामन्यांची कसोटी मालिका खेळवली जात आहे. या मालिकेतील पहिल्या दोन सामन्यात टीम इंडियाचा न्यूझीलंडकडून पराभव झाला आहे. मालिकेतील तिसरा सामना मुंबईत खेळला जात आहे. या सामन्यातील पहिल्या डावात न्यूझीलंडचा संघ २३५ धावांवर सर्वबाद झाला. प्रत्युत्तरात भारतीय संघाने सर्वबाद २६३ धावा करत २८ धावांची आघाडी घेतली. या दरम्यान ऋषभ पंतने ६० धावांची खेळी साकारत विशेष यादीत माजी भारतीय कर्णधार एमएस धोनीला मागे टाकले आहे.
ऋषभ पंतने धोनीला टाकले मागे –
टीम इंडियाचा स्टार यष्टीरक्षक फलंदाज ऋषभ पंतने न्यूझीलंडविरुद्धच्या तिसऱ्या कसोटी सामन्यात ५९ चेंडूत ६० धावांची खेळी केली. त्याने १०१.६९ च्या स्ट्राईक रेटने ८ चौकार आणि २ षटकार मारले. या खेळीच्या जोरावर त्याने खास यादीत एमएस धोनीला मागे टाकले. भारतासाठी कसोटी क्रिकेटमध्ये १०० हून अधिकच्या स्ट्राइक रेटसह सर्वाधिक वेळा ५० हून अधिक धावा करणाऱ्या खेळाडूंच्या यादीत ऋषभ पंत तिसऱ्या क्रमांकावर पोहोचला आहे. त्याने कसोटी क्रिकेटमध्ये पाच १०० हून अधिकच्या स्ट्राइक रेटसह सर्वाधिक वेळा ५० हून अधिक धावा केल्या आहेत. या बाबतीत त्याने एमएस धोनी, मोहम्मद अझरुद्दीन आणि यशस्वी जैस्वाल यांना मागे टाकले आहे. या तीन फलंदाजांनी केवळ चार वेळा अशी कामगिरी केली आहे.
भारतासाठी कसोटीत १०० हून अधिकच्या स्ट्राइक रेटसह सर्वाधिक वेळा ५० हून अधिक धावा करणारे फलंदाज :
- १४ – वीरेंद्र सेहवाग
- १३ – कपिल देव
- ५ – ऋषभ पंत
- ४ – मोहम्मद अझरुद्दीन
- ४ – एमएस धोनी
- ४ – यशस्वी जैस्वाल
कसोटी क्रिकेटमध्ये १०० पेक्षा जास्त स्ट्राइक रेटने सर्वाधिक अर्धशतकं झळकावणारे यष्टीरक्षक :
- ८ – ॲडम गिलख्रिस्ट
- ५ – ऋषभ पंत
- ४ – एमएस धोनी
- ४- जॉनी बेअरस्टो
- ४ – सर्फराज अहमद
- ३ – क्विंटन डी कॉक
- ३ – एन डिकवेला
- ३ – मॅट प्रायर
ऋषभ पंतने केवळ ३६ चेंडूत झळकावले अर्धशतक –
मुंबईतील वानखेडे स्टेडियमवर झालेल्या तिसऱ्या कसोटी सामन्यात ऋषभ पंतने अवघ्या ३६ चेंडूत अर्धशतक झळकावले. शुबमन गिलसह ऋषभ पंतने टीम इंडियाचा डाव सांभाळला. पहिल्या दिवशी ८६ धावांवर ४ विकेट्स गमावल्याने टीम इंडिया अडचणीत आली होती, पण पंतने शानदार फलंदाजी करत डाव सांभाळला आणि गिलसोबत ९६ धावांची भागीदारी केली. या सामन्यात गिलने ९० धावा केल्या. तो त्याच्या शतकापासून फक्त १० धावांनी दूर राहिला.
