लेव्हर चषक टेनिस स्पर्धा : फेडररचा टेनिसला भावपूर्ण निरोप

सामना संपल्यावर फेडररने प्रथम नदाल आणि नंतर प्रतिस्पर्धी जोडीला आिलगन दिले, तेव्हा त्याच्या डोळय़ाच्या कडा पाणावल्या होत्या. लंडनमधील स्थानिक वेळेनुसार सामना रात्री १२.३० वाजता संपला तरी, स्टेडियममधील प्रेक्षक जागेवरून हलले नव्हते. फेडररच्या कारकीर्दीचा आढावा घेतला जात असताना कोर्टवर बाजूला एकत्र बसलेल्या फेडरर आणि नदाल या दोघांनाही अश्रू अनावर झाले. अखेरच्या सामन्यासाठी येणाऱ्या प्रत्येकाचे फेडररने लढतीपूर्वी ‘ट्विटर’च्या माध्यमातून आभार मानले होते. त्याला अखेरच्या लढतीत यश मिळाले नसले तरी, २० ग्रॅंडस्लॅम विजेतीपदे, एकूण १०३ विजेतीपदे, सलग ३१० आठवडे जागतिक क्रमवारीत अव्वल स्थान, डेव्हिस चषक विजेतेपद, ऑलिम्पिक पदक अशा देदीप्यमान कारकीर्दीनंतर फेडररने टेनिसला अलविदा केले. 

निवृत्तीचा निर्णय जेव्हा घेतला, तेव्हा तो पूर्णपणे वैयक्तिक होता. सुरुवातीला मला या निर्णयाचे दु:ख वाटले. मात्र, जेव्हा अंतिम विचार केला तेव्हा हा सर्वोत्तम निर्णय असल्याची खात्री पटली.  

– रॉजर फेडरर

रॉजर फेडररने टेनिसला अलविदा केल्याने मला माझ्या आयुष्यातील एक भागदेखील निघून गेल्यासारखे वाटत आहे. त्याच्यासह आणि त्याच्याविरुद्ध खेळताना, जे काही क्षण माझ्या आयुष्यात आले, ते सगळे महत्त्वाचे आहेत. 

– राफेल नदाल