फेडरर, सेरेनाची शानदार सुरुवात

रॉजर फेडरर व सेरेना विल्यम्स या माजी जगज्जेत्या टेनिसपटूंनी फ्रेंच खुल्या टेनिस स्पर्धेत शानदार सुरुवात केली. व्हीनस विल्यम्स व अग्निस्झेका रॅडवान्स्का यांनीही विजयी सलामी केली.
माजी विजेत्या फेडररने पहिल्या फेरीत स्लोव्हाकियाच्या लुकास लॅकोवर ६-२, ६-४, ६-२ असा सरळ तीन सेट्समध्ये विजय मिळविला. स्वित्र्झलडच्या फेडररने परतीचे वेगवान फटके व नेटजवळून अचूक प्लेसिंग असा बहारदार खेळ केला. त्याने केलेल्या वेगवान खेळापुढे लुकासचा बचाव निष्प्रभ ठरला.
सहाव्या मानांकित टॉमस बर्डीचनेही विजयी प्रारंभ केला. त्याने कॅनडाच्या पीटर पोलनस्की याच्यावर ६-३, ६-४, ६-४ अशी मात केली. त्याने क्रॉसक्रोर्ट फटक्यांचा उपयोग करत हा सामना जिंकला.
आठव्या मानांकित मिलोस राओनिकने ऑस्ट्रेलियाच्या निक किर्गिओस याच्यावर मात करत दुसरी फेरी गाठली. त्याने हा सामना ६-३, ७-६ (७-१), ६-३ असा जिंकला. मिखाईल यॉझनीला पहिल्याच सामन्यात विजय मिळवण्यासाठी झगडावे लागले. त्याने उत्कंठापूर्ण लढतीत स्पेनच्या पाब्लो कॅरोनो बुस्टाचा ३-६, १-६, ६-३, ६-४, ६-० असा पराभव केला. पहिले दोन सेट्स गमावल्यानंतर त्याने सव्‍‌र्हिस व परतीच्या फटक्यांवर नियंत्रण ठेवत विजयश्री खेचून आणली.
महिलांमध्ये, व्हीनसने बेलिंडा बेन्किक हिच्यावर ६-४, ६-१ असा सरळ दोन सेट्समध्ये विजय मिळविला. २९ व्या मानांकित व्हीनसला पहिल्या सेटमध्ये झुंजावे लागले. त्या तुलनेत दुसरा सेट तिने एकतर्फी घेतला. तिची बहीण सेरेना हिने फ्रान्सच्या एलिझ लिम हिचे आव्हान ६-२, ६-१ असे संपुष्टात आणले. दोन्ही सेटमध्ये सेरेनाने निर्विवाद वर्चस्व गाजवले. तिने फोरहँडच्या ताकदवान फटक्यांबरोबरच लॉब्जचाही सुरेख खेळ केला.
पोलंडच्या अग्निस्झेकाने चीनची शुई झांग हिच्यावर ६-३, ६-० असा सफाईदार विजय मिळविला. तिसरे मानांकन मिळालेल्या अग्निझेका हिने पहिल्या सेटमध्ये सव्‍‌र्हिस ब्रेक मिळविला. दुसऱ्या सेटमध्ये तिने तीन वेळा सव्‍‌र्हिसब्रेक मिळवित सहज हा सेट घेतला आणि विजयावर शिक्कामोर्तब केले.