देवेंद्र पांडे, इंडियन एक्सप्रेस
Rohit Sharma opts to rest for Sydney Test: रोहित शर्मा ऑस्ट्रेलियाविरुद्धच्या सिडनीमध्ये होणाऱ्या पाचव्या कसोटी सामन्यात खेळताना दिसणार नाही. गौतम गंभीरने रोहित शर्मा सिडनी कसोटीत खेळणार की नाही, या प्रश्नावर दिलेल्या उत्तरानंतर रोहित शर्माच्या अखेरच्या कसोटी खेळण्याबाबत संभ्रम होता. यानतंर सोशल मीडियावर भारताच्या सराव सत्रादरम्यानचे अनेक व्हीडिओ फोटो समोर आल्याने रोहित शर्मा ही कसोटी खेळेल की नाही म्हणणारे बऱ्याच पोस्ट व्हायरल झाल्या होत्या, पण आता रोहित शर्माने स्वत:चं मोठा निर्णय घेतला असल्याचे समोर आले आहे.
इंडियन एक्सप्रेसच्या ताज्या वृत्तानुसार, रोहितने स्वतःला संघाबाहेर ठेवण्याचा निर्णय घेतला आहे. रोहितच्या जागी जसप्रीत बुमराह संघाचे नेतृत्व करताना दिसणार आहे. यासह शुबमन गिल पुन्हा एकदा प्लेइंग इलेव्हनचा भाग होईल. तर पाचव्या कसोटीत आकाशदीपच्या जागी प्रसिध कृष्णाला संधी मिळू शकते.
इंडियन एक्सप्रेसने दिलेल्या वृत्तानुसार, रोहितने प्रशिक्षक गौतम गंभीर आणि निवड समितीचे अध्यक्ष अजित आगरकर यांना त्याची प्लेईंग इलेव्हनमधील निवड रद्द करण्याच्या निर्णयाची माहिती दिली आहे आणि या निर्णयावर या दोघांनी सहमती दर्शवली आहे.
रोहितच्या या निर्णयाचा अर्थ असाही होऊ शकतो की मेलबर्नमधील बॉक्सिंग डे कसोटी रोहितची भारतासाठी शेवटची ठरली असावी, कारण यानंतर इंग्लंडच्या दौऱ्यापासून सुरू होणाऱ्या पुढील जागतिक कसोटी चॅम्पियनशिप चक्रामध्ये योजनांमध्ये रोहित शर्मा संघाच्या योजनांचा भाग नसू शकतो. सध्याच्या चक्रात भारत WTC फायनलसाठी पात्र ठरण्याची शक्यता फारच कमी आहे.
रोहित शर्माच्या जागी आता संघात शुबमन गिलला प्लेईंग इलेव्हनमध्ये संधी मिळणार आहे. मेलबर्न कसोटीत शुबमन गिलला वगळण्यात आल्यानंतर पत्रकार परिषदेत सहाय्यक प्रशिक्षक अभिषेक नायर यांना त्यासंदर्भात प्रश्न विचारण्यात आलं होतं. त्यावेळी शुबमनला वगळलेलं नसल्याचं त्यांनी स्पष्ट केलं होतं. संघाचं संतुलन योग्य असावं यादृष्टीने वॉशिंग्टनला संघात स्थान देण्याचा निर्णय झाला, यामुळे गिलला अंतिम अकरात जागा मिळू शकली नाही असं ते म्हणाले होते. रोहित शर्माने सिडनी कसोटीत विश्रांतीचा निर्णय घेतल्याने गिलचा संघात परतण्याचा मार्ग मोकळा झाला आहे.
दरम्यान पाठीच्या दुखण्यामुळे वेगवान गोलंदाज आकाश दीप सिडनी कसोटीत खेळू शकणार नाही. त्याच्याऐवजी हर्षित राणाला संधी मिळणार का प्रसिध कृष्णाला याविषयी उलटसुलट चर्चा सुरू होत्या. हर्षित राणा पर्थ कसोटीत खेळला होता. मात्र प्रदीर्घ स्पेल टाकल्यानंतर त्याची दमछाक उडाली होती. त्यामुळे सिडनी कसोटीत प्रसिध कृष्णाला अंतिम अकरात खेळवण्यात येणार आहे. कृष्णाने वर्षभरापूर्वी शेवटचा कसोटी सामना खेळला होता. २ कसोटीत त्याने २ विकेट्स पटकावल्या आहेत.
