“हो, ते अधिकृत आहे का?” ; मुख्य प्रशिक्षक म्हणून राहुल द्रविडच्या नियुक्तीवर रोहित शर्माची पहिली प्रतिक्रिया

राहुल द्रविडकच्या नियुक्तीवर रोहित शर्माने प्रतिक्रिया दिली आहे. अफगाणिस्तानविरुद्ध भारताने ६६ धावांनी विजय मिळविल्यानंतर पत्रकार परिषदेत रोहितला याबाबत विचारण्यात आले. रोहित म्हणाला, “हो, ते अधिकृत आहे का? साहजिकच, आम्ही खेळ खेळत होतो, त्यामुळे मला याची कल्पना नव्हती.” त्यानंतर रोहितने द्रविडचे अभिनंदन केले आणि संघ भारताच्या माजी कर्णधारासोबत काम करण्यास उत्सुक असल्याचे सांगितले. 

रोहित शर्मा म्हणाला, “वेगळ्या भूमिकेत भारतीय संघात पुनरागमन केल्याबद्दल राहुल द्रविडचे अभिनंदन, आम्ही त्यांच्यासोबत काम करण्यास उत्सुक आहोत. तो भारतीय क्रिकेटचा एक दिग्गज आहे आणि भविष्यात त्याच्यासोबत काम करणे चांगले राहील.” 

द्रविडने प्रशिक्षकपदासाठी अर्ज केल्यानंतर त्याची निवड निश्चित मानली जात होती. ‘‘सुलक्षणा नाईक आणि आरपी सिंह यांच्या क्रिकेट सल्लागार समितीने बुधवारी एकमताने राहुल द्रविडची भारतीय संघाच्या मुख्य प्रशिक्षकपदी निवड केली. आगामी न्यूझीलंडविरुद्धच्या मालिकेपासून त्याच्या प्रशिक्षकपदाचा कार्यकाळ सुरू होईल,’’ असे ‘बीसीसीआय’ने म्हटले आहे. सध्याचे मुख्य प्रशिक्षक रवी शास्त्री यांचा कार्यकाळ ट्वेन्टी-२० विश्वचषकानंतर संपुष्टात येईल.

राहुल द्रविड म्हणला, “भारतीय क्रिकेट संघाचा नवा मुख्य प्रशिक्षक म्हणून नेमणूक होणे हा माझ्यासाठी मोठा सन्मान आहे आणि ही जबाबदारी सांभाळण्यासाठी मी उत्सुक आहे. रवी शास्त्री यांच्या मार्गदर्शनाखाली भारतीय संघाने अप्रतिम कामगिरी केली असून या संघाला पुढे नेण्याची मला आशा आहे.”

बीसीसीआय’चा अध्यक्ष सौरव गांगुली म्हणाला, “राहुलने खेळाडू म्हणून उत्कृष्ट कामगिरी केली होती आणि तो सर्वोत्कृष्ट क्रिकेटपटूंपैकी एक मानला जातो. त्याने ‘एनसीए’चे अध्यक्षपदही यशस्वीरीत्या भूषवले. राहुलने ‘एनसीए’मध्ये कार्यरत असताना बऱ्याच युवा खेळाडूंना घडवले, ज्यांनी पुढे जाऊन आंतरराष्ट्रीय क्रिकेटमध्ये भारताचे प्रतिनिधित्व केले. आता तो त्याच्या नव्या भूमिकेत भारतीय क्रिकेटला नव्या उंचीवर नेईल अशी आशा आहे.”