IND vs AUS 5th Test Gautam Gambhir Press Conference Updates: बॉर्डर गावस्कर ट्रॉफीमध्ये भारतीय संघ १-२ ने पिछाडीवर आहे. सिडनीमध्ये मालिका बरोबरीत करण्याची अखेरची संधी भारतीय संघाला आहे. भारतीय संघाच्या खराब कामगिरीसाठी चाहते आणि दिग्गजांनीही कर्णधार रोहित शर्माला जबाबदार धरले आहे. गेल्या काही काळापासून रोहित शर्माचा फॉर्म फारच खराब राहिला आहे तर त्याच्या नेतृत्त्वाखाली भारताने मागील ४ कसोटी सामने गमावले आहेत. यानंतर आता रोहित शर्माने निवृत्ती घ्यावी असं चाहत्यांचं म्हणणं आहे. यादरम्यान आता भारताचे मुख्य प्रशिक्षक गौतम गंभीर यांनी गुरुवारी पत्रकारांना रोहितबाबत दिलेलं उत्तर चकित करणार आहे.
पाचव्या कसोटी सामन्यापूर्वी गौतम गंभीर पत्रकार परिषदेसाठी पोहोचले होते. याआधी रोहित शर्मा बहुतेक वेळा पत्रकार परिषदांमध्ये दिसला होता. सिडनी कसोटीच्या प्लेइंग इलेव्हनमध्ये रोहित शर्माच्या स्थानाबद्दल गंभीरला विचारण्यात आले. रोहित शर्मा सिडनी कसोटी खेळणार का, असा प्रश्न त्यांना पत्रकार परिषदेदरम्यान विचारण्यात आला.
या प्रश्नाच्या उत्तरात गौतम गंभीरने जे सांगितले त्याने सर्वांनाच आश्चर्यचकित केले. गंभीर म्हणाला, ‘खेळपट्टी पाहून आम्ही उद्या (३ जानेवारी) प्लेइंग इलेव्हन ठरवू.’ या उत्तराने सर्वांनाच आश्चर्याचा धक्का बसला आहे कारण खेळपट्टीनुसार कर्णधाराची निवड केली जात नाही. कर्णधार असतानाही रोहित शर्माच्या खेळण्याबाबत संभ्रम असेल, तर त्याला वगळले जाऊ शकते, अशी चर्चा चाहत्यांमध्ये सुरू आहे. शेवटच्या कसोटी सामन्यासाठी भारतीय संघात मोठे बदल निश्चित मानले जात आहेत.
रोहित शर्मा कर्णधार आहे आणि, संघात कर्णधाराचे स्थान आधीच निश्चित केले जाते. आता अशा स्थितीत संघाचे मुख्य प्रशिक्षक पत्रकार परिषदेत येऊन रोहित शर्माच्या खेळण्याबाबतचा निर्णयही नाणेफेकीच्या वेळीच घेतला जाईल, असे सांगत आहेत, तर मग रोहित शर्मा पाचवी कसोटी खेळणार की नाही याबाबत मोठा संभ्रम आहे. रोहित शर्माची कसोटीतील कामगिरी पाहून त्याच्यावर प्रश्नचिन्ह उपस्थित केले जात आहे.
ऑस्ट्रेलियात रोहितने आतापर्यंत पाच डावात केवळ ३१ धावा केल्या आहेत. याशिवाय घरच्या मैदानावर न्यूझीलंडविरुद्ध खेळल्या गेलेल्या कसोटी मालिकेत त्याने सहा डावांत आणि बांगलादेशविरुद्ध घरच्या मैदानावर फक्त ९१ धावा केल्या आणि बांगलादेशविरुद्धच्या घरच्या मालिकेत केवळ ४२ धावा केल्या होत्या. रोहितने १५ डावात केवळ १६४ धावा केल्या आहेत, ज्याची सरासरी ११ पेक्षा कमी आहे. कर्णधार म्हणून त्याची सरासरी ३०.५८ आहे, परंतु त्यापूर्वी त्याने ४६.८७ च्या सरासरीने धावा केल्या होत्या. २०२४ त्याला नावाप्रमाणे कामगिरी करता आली नाही.
