World Cup 2023: विश्वचषकात गांगुलीच्या खास विक्रमावर रोहितचे लक्ष्य, बांगलादेशविरुद्धच्या सामन्यात धोनीलाही टाकू शकतो मागे

३६ वर्षीय रोहितने या विश्वचषकात आतापर्यंत तीन डावात ७२च्या सरासरीने २१७ धावा केल्या आहेत. यामध्ये एक शतक आणि एका अर्धशतकाचा समावेश आहे. तो सध्या २०२३च्या विश्वचषक स्पर्धेत भारतीय संघाकडून सर्वाधिक धावा करणारा खेळाडू आहे. धोनीने २०११च्या विश्वचषकात २४१ धावा आणि २०१५च्या विश्वचषकात २३७ धावा केल्या होत्या. २५ धावा करताच रोहित धोनीचा विक्रम मोडेल. त्याचबरोबर कपिल देव, विराट कोहली आणि सौरव गांगुली यांचे रेकॉर्डही रोहितच्या निशाण्यावर असतील.

१९८३च्या विश्वचषकात भारतीय संघाला चॅम्पियन बनवणारा कर्णधार कपिल देव याने या स्पर्धेत ३०३ धावा केल्या होत्या. त्याचा विक्रम मागे ठेवण्यासाठी रोहितला ८७ धावांची गरज आहे. त्याचवेळी विराट कोहलीने २०१९ विश्वचषकात पाच अर्धशतकांच्या मदतीने ४४३ धावा केल्या होत्या. या यादीत सौरव गांगुली पहिल्या क्रमांकावर आहे. २००३च्या विश्वचषकात टीम इंडियाचे कर्णधार असताना त्याने तीन शतकांच्या मदतीने ४६५ धावा केल्या होत्या. या दोघांशिवाय कोणत्याही भारतीय कर्णधाराला विश्वचषकाच्या एकाच आवृत्तीत ४०० पेक्षा जास्त धावा करता आलेल्या नाहीत.

हेही वाचा: World Cup 2023: कर्णधार रोहित शर्माच्या कॅप्टन्सीवर रिकी पाँटिंगचे मोठे विधान; म्हणाला, “भारत अपेक्षांच्या दबावाखाली…”

गांगुलीचा विक्रम मोडण्यासाठी रोहितला २४९ धावांची गरज आहे. मात्र, त्याचा फॉर्म पाहता तो हे विक्रम मोडेल असे वाटते. रोहितचे सध्या साखळी फेरीत सहा सामने बाकी आहेत. जर टीम इंडिया उपांत्य फेरीत आणि नंतर अंतिम फेरी गाठण्यात यशस्वी ठरली तर रोहित आठ सामने खेळेल. हिटमेनचा हा तिसरा एकदिवसीय विश्वचषक आहे. याआधी तो २०१५ आणि २०१९ विश्वचषकही खेळला होता.

विश्वचषकातील २० सामन्यांमध्ये त्याच्या नावावर ११९५ धावा आहेत. भारतीय खेळाडूंमध्ये सचिन तेंडुलकरने वर्ल्ड कपमध्ये सर्वाधिक २२७८ धावा केल्या आहेत. रोहित दुसऱ्या क्रमांकावर आहे. तिसऱ्या स्थानावर विराट कोहली असून त्याने २९ विश्वचषक सामन्यांमध्ये ११८६ धावा केल्या आहेत.

हेही वाचा: World Cup 2023: “भाऊ स्विगीला ऑर्डर द्या मला…”, सूर्यकुमार यादवने सोशल मीडियावरील ट्रोलर्सला दिले सडेतोड उत्तर

रोहितने २०१५ विश्वचषक स्पर्धेत आठ सामन्यांत ४७.१४च्या सरासरीने ३३० धावा केल्या होत्या. यामध्ये एक शतक आणि दोन अर्धशतकांचा समावेश आहे. त्याच वेळी, रोहित २०१९च्या विश्वचषकात सर्वाधिक धावा करणारा फलंदाज होता. त्याने नऊ सामन्यांमध्ये ८१च्या सरासरीने ६४८ धावा केल्या. यामध्ये पाच शतकांचा समावेश आहे. रोहितच्या एकदिवसीय कारकिर्दीबद्दल बोलायचे झाल्यास, त्याने २५४ सामन्यांच्या २४६ डावांमध्ये ४९.१९च्या सरासरीने १०,३२९ धावा केल्या आहेत. यामध्ये ३१ शतके आणि ५३ अर्धशतकांचा समावेश आहे. एकदिवसीय क्रिकेटमध्ये तीन द्विशतके झळकावणारा रोहित हा एकमेव फलंदाज आहे.